La Cordinaora Ecoloxista d’Asturies vien de desixir a la Demarcación de Costes d’Asturies que depende del Ministeriu d’Agricultura español y al “Principado” que tomen les midíes afayaíces pa torgar l’usu illegal que se fai d’una fastera verde como aparcaeru na Concha d’Artéu cola complicidá del Ayuntamientu Cuideiru que lo tolera.

Y ye que na marxe izquierda de la desembocadura del ríu Uncín, en fastera de servidumbre de proteición, l’Ayuntamientu Cuideiru executó y caltién periódicamente colos sos trabayaores o empreses contrataes, un aparcaeru asitiáu nun tarrén que pola so calificación y asitiamientu nun ta permitío, sobro too si se tien en cuenta que nesa playa’l Ministeriu y la Conseyería de Mediu Ambiente del “Principado” rializaren un ordenamientu y unes obres consistentes en retirar les places d’aparcaeru dende los llugares averaos a la mar fasta un gran parking asitiáu na fastera afayaíza.

 Hai de remembrar que les marismes del ríu Uncín, na Concha d’Artéu son un llugar persensible y d’altu valor natural, que forma parte del LIC Cabu Bustu a Lluanco, nel que s’afaya numberosa fauna protexía.

Arriendes d’ello, el Plan Especial de la playa espublizáu nel BOPA falaba de la necesidá de regular y llendar el xorrecimientu de la fastera. Nun paez qu’un aparcaeru na zona ambientalmente más valiosa del alrodiu seya lo más afayaízo pa preservar los valores naturales.

Por eso la Cordinaora Ecoloxista desixe a les Alministraciones responsables que recuerden que la normativa obliga a usar los aparcaeros llegales y lo demás ye sancionable dao que nun pue afayase una fastera verde pa esi usu pol impautu que xenera.

This work is licensed under a Creative Commons Attribution 4.0 International License.