Victoria pa Sebastián Vettel, afianzando asina la primer posición nel mundial. Completen el podiu Raikkonen segundu y Ricciardo terceru. Raikkonen partía dende la pole, pero Vettel tenía meyor ritmu y tras la parada l’alemán algamo la preciada primer posición nesti GP

La carrera de Mónaco aveza ser de les más aburríes, pues el circuitu fai que seya díficil adelantar. nesta carrera coses como la estratexa de paraes, la posición de salida, o la salida del Safety Car nel momentu xusto son vitales pa ganar la carrera. Nesta ocasión los dos Ferrari salíen per delantre, lo que prauticamente-yos daba ya la victoria. Por otra parte, yera una carrera distinta, pues el pilotu asturianu nun taba en Mónaco, sinón en Indianapolis, en sustitución suya corría’l campeón del mundiu y pilotu de reserva de McLaren, Jenson Button.

Carlos Sainz, sestu

El pilotu de Toro Rosso fizo una actuación xenial y algamó esa sesta posición, que ye la meyor de les que taben al so alcance. Asina, el pilotu madrilanu suma unos puntos que sedrán importantes nel so mundial y nel del so equipu. Les sos actuaciones en Toro Rosso son perbones, y de xuru que’l pilotu espera llamar l’atención d’otros equipos más grandes pa tener opciones al campeonatu, lo que tolos pilotos quieren.

Hamilton recupera en carrera depués de la desastrosa clasificación

El sábadu p’Hamilton foi un desastre, infortunios y males actuaciones ficieron que nun pudiera algamar más que la 14º posición. Problemes pa Mercedes esti GP, que paecía nun tar a l’altura, anque la situación ameyoró’l domingu. Terminó 7º, faciendo una gran actuación y adelantando nun circuitu como’l de Montecarlo. Nun pudo facer más, pero ye una persona que prefier ver el vasu mediu llenu y pensar nes prósimes carreres “Ye imposible adelantar equí, y más colos coches qu’hai agora” La sensación ye que Ferrari ta un pasu per delantre de Mercedes. Paez que Mercedes nun sabe trabayar nos neumáticos. El problema ye que van mui bien nunes carreres pero mal en otres, y nun saben porqué.

Brutal accidente de Wehrlein

El culebrón ente Button y Wehrlein entamó nes primeres vueltes. Ambos pilotos entraron al box Wehrlein salió per delantre cuando nun debía, fecho que dirección de carrera taba investigando nel momentu d’un accidente pa recordar. Nuna de les curves más cerraes, enantes d’entrar al túnel de Montecarlo, tocáronse coles ruedes Button y Wehrlein, emburriando’l de McLaren al de Sauber y faciendo que’l so coche quedará mediu volcáu (nesti casu, la imaxe vale más que mil pallabres). El pilotu alcuéntrase bien, anque viendo que ya a entamos de temporada tuvo problemes col cuellu y la espalda, esperemos qu’esto nun tenga consecuencies nel mundial de Sauber y que’l so pilotu pueda correr nel prósimu GP de Canadá.

Problemes cola temperatura

Una de les quexes de los pilotos nesti Gran Premiu foi la de la temperatura de frenos y tamién de neumáticos. El pilotu de McLaren, compañeru d’Alonso, Stoffel Vandoorne, tuvo qu’abandonar tras chocar nuna curva por esti problema. Tamién Marcos Ericsson de Sauber tuvo qu’abandonar una vuelta depués del so compañeru, al perder temperatura por dir detrás del Safety Car. Stroll foi otru de los pilotos que mostró quexes nel momentu del Safety Car por estos fechos.

Tola actualidá de la Formula 1 y del meyor motor, siempres n’asturianu, en Twitter @F1Nast

This work is licensed under a Creative Commons Attribution 4.0 International License.