La Casa Conceyu Piloña ta acabante de convocar el concursu d’enramáu de fontes per San Xuan, una iniciativa que recupera dempués de dellos años ensin entamase
Cuenta’l canciu y la lleenda que na nueche de San Xuan ábrese la puerte pente los dos llaos de la realidá –el que conocemos ya’l que non, que nomamos máxicu- y ye posible la comunicación pente los seres de los dos mundios. Poro, prendemos fogueres, danciamos, canciamos, garramos la flor del agua ya enramamos les fontes.
“Vamos a enramar la fuente, con una torta caliente,
una xarra de cuayada y una guya bien tostada”
Los ramos y la torta, pa la xana, asina comu la guya, pa que cosa col so filu d’oru; la llechi cuayao pal xanín, porque comu se sabe, les xanes nun traen llechi.
El vezu d’enramar fontes na máxica nueche de San Xuan, siquiera con flores y ramos, sigui vivu en munches fasteres d’Asturies. Sicasí, siempres ye importante que se reforcie colos sofitos de les instituciones, como fai nesti casu la Casa Conceyu de Piloña, que col envís de caltener y reforciar esta tradición convoca’l concursu d’enramáu de fontes San Xuan 2.017.
Nelli podrán participar cualisquier asociación o Xunta Vecinal del Conceyu, previa iscripción –previa al 20 de xunu- na Casa Cultura d’Infiestu o a traviés del teléfonu 985 71 11 33, indicándose l’allugamientu esautu de la fonte.
Los premios, que van de 100 a 300 euros, destinaránse obligatoriamente a materiales pa igua y caltenimientu de fontes, afitando al tiempu una tradición y curiando’l padremoñu’l conceyu.
Llucía Fernández Marqués
This work is licensed under a Creative Commons Attribution 4.0 International License.
