David Castañón – www.lesfartures.com – @lesfartures
Hai llocures que namás se faen so circunstancies per especiales. En 2016, por mor del cambéu d’instalación de Cerveza Cotoya al polígonu de Ponte Nora (Llugones), Diego Cotoya, ceador de Cerveza Cotoya, Andrés Torres, propietariu de la Cervecería El Lúpulu Féroz, Pablo García, propietariu de la Cervecería El Cabanón; y David Montes, cocineru, anguaño nel Go Sushi; axuntaron pa crear el Primer Asturies Cask Festival.
Llevábamos años de pequeños entamos cola cerveza presentada na so forma tradicional “Cask Ale o Real Ale”, pero d’ende a entamar un día enteru con solo cerveza asina presentada hai un bon cachu, y más fuera de les isles britániques, onde apenes hai tradición. Dacfechu, llocures de cerveceros asturianos, que nos dan munches allegríes.
Si amás sumes que Cerveza Cotoya apurre la so cerveza bandera, Cotoya Original, presentada en cask, potenciando muncho más el so estilu inglés, y que’l día nun pasaba los 15º, fixo qu’esi día Asturies averárase un poco más a los sos vecinos del norte, o viceversa.
Tradicionalmente, la cerveza inglés comercializase en barriles de madera, qu’empezaron a ser reemplazaos por barriles d’aceru o aluminiu a mediaos del S.XX. Hai dos tipos de barriles de metal: los cask y los keg. Los más conocíos son los Keg, que tienen una válvula que dexa inyectar gas nel barril cuando s’estrayi’l llíquidu (vamos, los barriles de caña a los que toos tamos acostumáivos).
Los barriles tipu Cask tán diseñaos pa que la cerveza se saque ensin necesidá d’inyectar gas o de pasar por un enfriador. Contien cerveza ensin penerar, pasteurizar nin carbonatada artificialmente, ello ye que’l so periodu de consumu suel ser llimitáu yá que sigue lleldando dientro’l barril. Por mor d’esto ye per complicáu atopar un barril d’esti tipu fora de les Isles Britániques.
Presentáronnos 3 cerveces, la yá conocida Cotoya Original, asturiana, tipu bitter inglés. Una cerveza de 5,5% pa tomar sele, el cask esanicia parte de la carbonatación, y ameyora dafechu la cerveza. Nun ye porque sía la de casa, nin porque Diego faiga un trabayu esceicional, ye que ta per bona.
Les otres dos cerveces, de la Fábrica Shepherd Neame, de Kent (Inglaterra). La Fábrica de cerveza más antiguo d’Inglaterra, lleven dende 1698 (anque esiste tradición na zona dende’l SXIV), faciendo cerveza y anguaño son una de les marques más conocíes nes isles. Con un imperiu de pubs, inclusive d’hoteles, siguen ellaborando de forma artesanal les sos cerveces, y tienen una esbilla d’estilos enorme que nun para crecer.
Nesta ocasión, probemos dos de les sos cerveces cask más conocíes, la Bishops Finger, una de les cerveces más antigües d’Inglaterra, estilu Kentish Strong Ale (tien IGP propia pa esa cerveza, nenguna otra puede llamase Kentish Strong Ale), famosa precisamente por ser una de les primeres cerveces “fuertes”, que lleven embotellando dende 1958. Llúpulu de Kent, cebada, n’agua mineral de la mesma cervecera pa una cerveza que da 5% de color acoloratáu, arumes duces y malta turrada, y sabor a malta, con un toque duce y amargoso a la fin bien bonu. Maraviyosa cerveza.
La otra cerveza disponible, foi Hog Island, una refrescante pale ale de 4,8% que se desmarca de la tradición de Sherperd Neame d’utilizar llúpulu de Kent, y preba con otros de la zona, pa consiguir una rubia nidia, llimpia y refrescante. Xenial el toque cítricu que tien, que xunto cola ausencia de cuerpu, fai que sía una cerveza pa nun parar enxamás de beber.
Y como la cerveza entraba sola, lo meyor ye amestalo con dalguna de les creaciones de David Montes, magu qu’entemez la cocina rápido de calidá colos guisos tradicionales como naide. Nesta ocasión, una Hamburguesa de Xabalín, con Cebolla Colorada, Mazana Reineta y Mueyu de Trufa. Con un Pan con Lleldu de Cerveza (fechu especialmente na panadería pa la ocasión. Nada de mercalo yá fechu). . Perfecta. Vais Atopar a David pol Go Sushi, pero si lo cruciáis en dalgún Food Truck, ponéivos nes sos manos porque vais ablucar.
De 12 a 8 la tarde. Probemos cerveza, iguamos el mundu cerveceru (y de camín, el sidreru), esfrutamos colos amigos, comimos de lluxu y comprobemos cómo un asturianu, cola so pequena fábrica de cerveza asturiano, ye capaz de bermeyar a la fábrica más antigua d’Inglaterra. Llarga vida a Cotoya y a estos llocos cerveceros que tan felices nos faen.
¡Yá tamos esperando’l III Asturies Cask Festival!
This work is licensed under a Creative Commons Attribution 4.0 International License.
