Coleutivos de dislesia, hiperactividá, altes capacidaes y asperger acomuñen pa desixir que los escolinos con necesidaes especiales reciban l’atención que necesiten

La Plataforma Asturiana pola Educación Inclusiva ñaz como una ferramienta pa xunir esfuerzos. Dislesia Asturies, ANHIPA (Asociación de Neños Hiperactivos del Principáu d’Asturies), Asociación Asperger Asturies y APADAC (Asociación de Pas d’Alumnos d’Altes Capacidaes d’Asturies) cientren el so llabor en neños con distintes peculiaridaes, pero comparten un mesmu oxetivu: qu’estos estudiantes reciban la educación que necesiten. Tamos falando de 1.800 menores pertenecientes a estes asociaciones, pero el total d’afeutaos me muncho mayor, el 26% de la población escolar asturiana, qu’anguañu tan siendo infraatendidos dientro d’un sistema educativu nel que salise de la norma puede convertise nuna torga insalvable si nun se cuenta col apoyu necesariu, con graves consecuencies pal so desendolcu sicolóxicu y escolar.

La mayor dificultá cola que s’alcuentren estos coleutivos ye la falta de formación y d’implicación de bona parte del profesoráu, amás de la probitú de medios nos cientros, polo qu’entre sos demandes destaquen les de formación continua del  profesoráu y l’ampliación de la plantiya docente, incluyendo especialistes como pedagogos u orientadores. Pa estes families el tratu colos docentes ye “una especie de llotería” ya que la vida de sos fios puede ser mui estremada en función del gráu d’enfotu y formación del enseñante.

Otres reclamaciones de los pas son l’axilización de la puesta en marcha de les midies y programes de deteción temprana que permitan atender a los escolinos a tiempu, ya que s’entarda muncho en consiguir un diagnósticu y más entá en llograr que se tomen les midies correspondientes, polo qu’en munchos casos pa cuando se ponen en marcha les adautaciones l’avance académicu y personal del alumnu ya ta dañáu.

Llucía F. Marqués

This work is licensed under a Creative Commons Attribution 4.0 International License.