Ca vuelta resulta más nidio que’l “desfalcu” nel Montepío foi consentíu dende’l gobiernu central, no que paez un pagu encubiertu a cabezaleros de SOMA y PSOE pola so complicidá nel preslle de la minería asturiana.
Con ca nueu datu paez acreditase una clara conivencia ente l’Estáu español y dirixentes del SOMA y PSOE, ye la única desplicación que xustificaríe que’l Ministeriu español camudare los fondos mineros y blindare’l Montepíu frete a tolos controles.
Y ye que’l gobiernu central elliminó’l llimité llegal de financiamientu y pagó con fondos públicos el 100% de la inversión (31 millones!!) cuyu destinatariu final foi una empresa privada, aniciada espresamente por José Antonio Postigo, llugarteniente de Villa y presidente de la mutualidá.
Por si nun fuera abondo, el gobiernu central tampoco nun sometió’l proyeutu, nin les obres nin los pagos a denguna triba de fiscalización. Incluso amplió’l presupuestu inicial en más de dos millones d’euros pa incluyir l’abonu del proyeutu y los trabayos que ya entamaren fasta dos años enantes, saltando la llexislación en materia de contratación.
Ye más, cuando l’Istitutu pa la Reestructuración de la Minería (dempués d’abonar 27 millones de los 32 del xeriátricu), deteutó anomalíes que facíen que’l proyeutu pal complexu xeriátricu nun cuntara con cobertura llegal, loq ue se fexo foi modificar el rial decretu que regula los fondos mineros p’ampliar el llímite del 1% que se podía conceder a entidaes ensin ánimu de llucru, anque caltuvo que les aídes debíen treslladase integramente a beneficiarios finales non empresariales, pesia lo que foron a parar a la empresa de Postigo “Residencia de Mayores de la Minería SL”, incumpliendo asina la llexislación.
Énte semeyante “complicidá” ente’l gobiernu central y los presuntos defraudaores de, en principiu, más de 15 millones d’euros, ca vegada garra más fuercia la teoría defendía por Andecha Astur dende un entamu que sostién que les direiciones de los sindicatos mayoritarios, y los gobiernos de PSOE-IU collaboraron de forma decidío ya interesao nel preslle de la minería asturiana, algamando beneficios presonales por ello, polo que “más qu’un robu en rialidá de los que se trataba yera de pagar xenerosamente a los dirixentes de SOMA-PSOE pola so collaboración nel preslle de la minería asturiana”.
Fasta agora los datos paecen corroborar esta versión ¿Y Areces? ¿Cuándo-y toca a Areces? Amiesten dende Andecha Astur
This work is licensed under a Creative Commons Attribution 4.0 International License.
