En 1929 unos rapazos d’Uviéu funden el Rosal FC col llema MocedáYOptimismu, , pallabres que recueyen bien l’espíritu d’esti clú. Güei comu hai 88 años, destaquen pol so compromisu con Asturies y cola mocedá, siempres en positivu, coscientes que nos equipos de fúbol xuégase daqué más que l’arruelu
Nesti casu, la ilusión taba puesta en ganar a la Piloñesa, nel HFE Tensi, partíu que yos daría l’ascensu a primera. El saltu de categoría ya lu acolumbraron nel menutu trece, cuando entamó Osky el marcaor. El penalti de Lafuente, xusto anantes del descansu, ya’l gol de Pablín, a tres menutos del final –menutu 87- remataron el partíu con un resultáu de 3-0 qu’afitaba l’ascensu al Rosal, un club que siempres destacó, pente otres coses, pol so usu la llingua llariega.
El CD Ujo y el Miranda foron los otros dos equipos que tamién dieron el saltu, tres de superar les sos eliminatories, colo que se xunen al grupu entamáu pol CD Llangréu, el Lealtad B, l’Eulalia ya’l Treviense, qu’ascendieron de manera direuta.
Los puestos que quedaron vacantes en Segunda Asturiana cola subida d’estos seies equipos van ser cubiertos pol Atléticu Camocha, la SD Campumanes, el Llanes B, el Juventud Estadio y l’Atlético Siero. La sesta plaza yera la que-y correspondería al Glamour, clú que se retiró de la competición.
Llucía F. Marqués
This work is licensed under a Creative Commons Attribution 4.0 International License.
