El 12 de xunu cellebrase’l díi contra la esplotación de la reciella, con una concentración na Plaza 6 d’Agostu. Munchos de los que van dir fadránlo vistíos con ropa de Benetton, Inditex o Nike, dalgunes de les marques más conocíes pol so despreciu a los drechos humanos y al mediu ambiente
Fai 4 años indignábamonos polos 1134 muertos d’un complexu testil en Bangladesh –tampoco muncho, ¿eh? Que nun yeren parisinos- con más de 2.000 firíes, el 80 % muyeres. Ellí había cinco fábriques de ropa que producíen pa marques europees, Inditex, el Corte Inglés, Cortefiel… apocayá llamentábamos pol millón d’hectárees robaes impunemente por Benetton al pueblu mapuche.
De cutio recibimos noticies sobro Zara-Inditex y les sos denuncies de trabayu esclavu, trabayu infantil, violaciones al drechu llaboral. Inditex y Zara integren al segundu home más ricu del mundu y al executivu que más cobra de toles empreses españoles.
El 70% de la ropa que se consume n’Europa produzse’n condiciones d’esclavitú; empreses como Inditex consiguen beneficios récord vistiendo Europa con man d’obra esclavo en plenu sieglu XXI El
El Parlamentu Européu aprobó a finales d’abril una iniciativa qu’encamienta a la Comisión a ellaborar una llexislación que blinde a los trabayaores del sector testil y obligue a los estremaos proveedores a respetar los sos derechos. Recibió’l respaldu de 505 eurodiputaos, frente a 49 que votaron en contra y 57 que s’astuvieron. La iniciativa aprobada inclúi midíes comu que l’etiquetáu faiga visible “l’impactu social de la producción” pero ¿realmente nun sabemos yá qu’empreses producen neses condiciones? ¿va llendase la llexislación europea a afatar les etiquetes de la ropa con semeyes de neños trabayando, nun murniu asonsañu de les campañes antitabacu?
12 de xunu. Día mundial contra’l trabayu infantil.
La fecha foi instituyida pola OIT: “tenemos de trabayar por que tou neñu tea drechu a la educación y por que nun tea de trabayar pa sobrevivir. L’oxetivu ye una educación de calidá pa la reciella y un trabayu decente pa los adultos.”
400 millones de neños y neñes nel mundu trabayen en condiciones qu’equivalen a trabayos forzaos. Dalgunes de les empreses testiles más conocíes benefíciense d’ello, n’ocasiones direutamente y n’ocasiones al traviés de sucontrates, utilizando lo que los espertos llamen “arquitectura xurídica de la Impunidá.”, esto ye, llavase les manes énte los abusos cometíos nel so nome y pal so beneficiu.
El 12 de xunu, a les siete la tardi na plaza Seis d’Agostu de Xixón puedes manifestate contra tou esti despropósitu. Pero p’ayudalos puedes faer daqué muncho meyor. Puedes dexar de mercar ropa esclavo.
Llucía F. Marqués
This work is licensed under a Creative Commons Attribution 4.0 International License.
