El 70% de la población asturiana podría utilizar con normalidá l’asturianu nel so conceyu si esistiere una voluntá real de los que dicen ser favoratibles a la reconocencia democrática  de la nuesa llingua, ello ye la Oficialidá -Podemos, IU-

La parlamentaria de Podemos n’Europa, Estefanía Torres, llamenta que la Eurocámara y  ñegue’l drechu a espresase na so llingua materna, nel 25 aniversariu de la Carta Europea de les Llingües Minoritaries no que califica de «ataque frontal al padrimoniu cultural del pueblu asturianu»

Nos ayuntamientos podemites los drechos llingüísticos reconocíos llegalmente a los vecinos son los mesmos que los de los Ayuntamientos del PP o’l PSOE: dengún. Sicasí, la suma de los conceyos onde Podemos ya IU son el gobiernu, formen parte d’elli o lu condicionen conformen más del 70% de la población asturiana: Uviéu, Teberga, Illas, Llangréu, Castrillón, Grau, Mieres, Riosa y Xixón. En dengún d’esos conceyos esisten unes Ordenances Municipales d’Oficialidá, como les que sí hai en Bimenes y Noreña, que defendan los drechos del pueblu asturianu qu’esta parlamentaria reclama n’Europa (ignorando, quiciás, que pa usar una de les llingües non oficiales nel parlamentu européu esisten unos trámites previos, acompangaos de la correspondiente torna, que permitan asegurar la correcha comprensión de la intervención por parte de los presentes)

Dende Andecha  Astur califiquen esta aición de “Posturéu y más posturéu, política de xestos ensin fechos y quedar bien ensin gastar, aparte de considerar qu’estes payasaes si nun tienen un encontu políticu rial son contraproducentes pa la normalización real de la llingua asturiana”

This work is licensed under a Creative Commons Attribution 4.0 International License.