La única “escuela” n’asturianu dafechu  ufre a los neños y neñes fasta 6 años un espaciu onde xugar y deprender na nuesa llingua

La Escolina ye un proyeutu de Reciella families pol asturiano que lleva dos cursos enllenando un ermu educativu qu’esmolez a munches families asturianes: el de la enseñanza  na llingua llariega. Dende hai un par de cursos, neños y neñes de 0 a 6 años aconceyen una vegada a la selmana pa deprender n’asturianu a traviés del deprendizaxe manipulativu y por descubrimientu, nun entornu de socialización cola reciella de la so edá, siempre col acompañamientu de profesoráu especializao y en grupinos pequeños.

L’aniciativa medra a bon pasu, entamó en Xixón con diez rapacinos y vien de graduar esti añu a 40 escolinos. Ya tien 6 grupos: ún n’ Uviéu, otru en Candás y 4 en Xixón, pero tan dimpuestos a entamar más n’estremaos conceyos en función de la demanda.

Pa ello ye importante que les families faigan estos díes la prematrícula, per un priváu na páxina de Reciella en Facebook o a traviés d’un mensaxe a info@reciella.com, nel que se detallará la edá del escolín/a interesáu ya’l so conceyu de residencia, arriendes de les preferencies o restricciones de díi ya horariu.

Llucía F. Marqués

This work is licensed under a Creative Commons Attribution 4.0 International License.