SUATEA denuncia que l’alministración niégase a dotar a dellos centros del profesoráu imprescindible pa garantizar unes correches condiciones d’escolarización pal cursu prósimu. El sindicatu d’enseñantes unvió un comunicáu a tolos grupos políticos de la Xunta Xeneral desixendo negociación
L’esmolecimientu pol cursu viniente entama ya anantes de finar esti. Los equipos direutivos de colexos ya institutos entamen a denunciar retayos al comprobar les plantiyes pal cursu 2.017/2.018. Dellos centros saben yá que van cuntar con menos profesoráu, magar la medría sustancial del alumnáu, previendo munchos que nun se cubran siquiera los puestos imprescindibles pa ser quien a cuadrar tutoríes.
Esmolez tamién la escasez de profesoráu de PT y AL: con un mayor númberu d’escolinos con necesidaes de sofitu educativu caltiénse’l profesoráu del cursu pasáu, incumpliendo los alcuerdos roblaos coles organizaciones sindicales.
Tampoco s’atienden los pidimientos de que se caltengan abiertes aules como la de Barres, del CRA de Tapia-Castropol, que cunta con alumnáu pal prósimu cursu y que sigue esperando una rempuesta frente a l’amenaza de zarru.
Denuncien tamién que la conseyería nun desendolcase la so llabor de previsión ellaborando un estudiu previu de les necesidaes de los centros, sinón que-yos reclamó a estos toa una riestra de documentos sobro la organización del prósimu cursu, incluyendo l’atribución de les Tutoríes a los distintos departamentos nel casu de secundaria, lo que significó trabayu asgaya pa unes plantiyes escases y yá sobropasaes.
Una vegada fechu tou esti trabayu, coles propuestes de necesidaes autorizaes pal cursu próximu y los correspondientes allegamientos unviaos dientru’l plazu establecíu, la Conseyería d’Educación contestó de forma negativo en bona parte los casos. Los equipos a los que se-yos refugó la concesión de profesoráu tán esmolecíos pola inesistencia de canales d’interllocución cola Conseyería d’Educación pa tratar los allegamientos presentaos y nun teníos en cuenta.
La impotencia ante la falta de rempuesta a les demandes multiplícase cuando l’argumentu esgrimíu pa nun negociar estos retayos ye meramente económicu, ello ye, reconocen qu’esi profesoráu ye necesariu pal correchu furrulamientu del centru y l’afayadiza atención al alumnáu pero nun se considera pertinente “el gastu”. Nun foi posible l’aconceyamientu cola Dirección Xeneral de Personal, “ya qu’esto nun ye oxetu de negociación” y nos casos nos que los equipos consiguieron falar direutamente colos funcionarios de la Dirección Xeneral de Personal y Planificación Educativa, la respuesta a les demandes ye que’l departamentu de Costos nun autorizó la concesión del profesoráu demandáu.
Pa SUATEA esta rempuesta ye inadmitible. Numberosos equipos direutivos solicitaron al sindicatu que pidan a l’Alministración “un mecanismu pa garantizar que los pidimientos sían estudiaos y atendíos y nun s’obligue a los centros a esperar hasta bien entrao setiembre pa llograr in extremis – nel meyor de los casos- el profesoráu necesariu p’atender toles xeres, incluyendo l’atención a la diversidá, o pa tener que suprimir sofitos y esaniciar proyeutos y programes nos que los centros tán trabayando.”
This work is licensed under a Creative Commons Attribution 4.0 International License.
