Dende la formación asturiana señalen que les posiciones d’ambos partíos son cada vegada más asemeyaes “en forma y fechos” por mor de lo que llamen la so pasoquización (en referencia a lo ocurrío col partíu socialista griegu, cuasique esaniciáu tres d’aplicar polítiques d’austeridá)

El pelligru p’Asturies, según Miguel Ánxelu Agudo  Rodicio, representante d’Andecha Uviéu, radica nel usu que se fai dende estos partios de les cuestiones asturianes, utilizándoles como moneda de cambiu p’algamar cuotes de poder nel estáu español.

Eso desplicaría la falta d’enfotu de Podemos a la hora de mover temes comprometíos, como llucha en defensa la oficialidá del asturianu o la persecución de la corrupción de cargos del PSOE n’Asturies.

Cita como exemplos d’esta “tabula rasa” la falta de reclamación real de responsabilidaes pol marafundiu d’El Musel, la llenta actuación col casu Villa ya’l so alrodiu o la impunidá del expresidente socialista  Vicente Alvarez Areces, actualmente nel senáu español, nel casu los fondos mineros.

Respeutu a esti caberu tema resalta qu’estos fondos  mineros nun aportaron enxamás al que yera la so fin principal: “l’espoxigue’l pueblu asturianu, fundíu pola mor de la desindustrialización, perbién planificada pa nós pol Estáu Españo más que nada pa finar col movimientu obreru ‘l nuesu país. Lo que nun algamó’l facismu franquista… fueron ellos quién pa con ello.

Redaición InfoAsturies

This work is licensed under a Creative Commons Attribution 4.0 International License.