Sidrocoles lleva los sos Xuegos de la Mazana a los colexos d’Asturies pa presllar l’añu escolar con sidre y cultura sidrera

Dende va unos años, a la cellebración de les folixes que presllen el calendariu escolar nun puede llevase sidre. Esta prohibición afeuta sobromanera a los AMPAS que, normalmente fuera l’horariu escolar, entamaben folixes familiares nos cientros y vendíen sidre a los adultos, como en cualisquier otra romería, ensin que se rexistrase dalu incidente prevocáu pol consumu de sidre.

La so prohibición recibió dende l’entamu dures critiques, ya que dende la comunidá escolar consideren que ye romper con una  tradición mui nuesa que nun facía mal a

naide “Pola contra, el consumu moderáu de sidre por parte de les families nun ambiente festivu y tranquilu favorez el que los rapacinos entiendan el conceutu de consumu responsable” retruquen a los que consideren qu’afala a los neños al consumu d’alcool.

En cualisquier casu, la sidre atopó el so camín p’aportar a les escueles nesti díe tan señaláu colos Xuegos de la Mazana, que nun son otra que los xuegos de siempres, pero cola mazana y la sidre como filu conductor: carrera de manzana en cuyar, comer la manzana escolingada d’un filu, pescar manzanes cola boca, blincar en sacos de mazana y la preferida pola reciella, deprender a escanciar… seique seya con agua. Una prestosa propuesta perfechamente esportable a fiestes de práu ya otres cellebraciones.

This work is licensed under a Creative Commons Attribution 4.0 International License.