L’Asociación de Diabéticos d’Asturies en collaboración con Novo Nordisk informen en Xixón de la rellación pente la diabetes ya’l riesgu cardiovascular
N’Asturies estímase qu’hai alrodiu de 140.000 persones que carecen diabetes, la mayoría con diabetes tipu 2. Les complicaciones asociaes a esti tipu de diabetes incluin tensión alta, obesidá y altu nivel de zucre en sangre, lo qu’en munchos casos, si nun se sigue un tratamientu ya una dieta afayaizos, deriva n’enfermedá cardiovascular siendo esta la cimera causa de muerte de les persones que la carecen.
Esi ye’l motivu de la campaña de sensibilización nacional dirixía a los diabéticos col eslogan “De coral, curia la to diabetes”, que quier esparder información so les enfermedaes cardiovasculares y cómo un correchu tratamientu, dieta y exerciciu pueden controlar el riesgu. La charra sedrá impartía pol Dr. Edelmiro Menéndez Torre, xefe del Serviciu d’Endocrinoloxía del HUCA, nel Atenéu Obreru de La Calzada, en Xixón, de magar les siete la tardi.
ASDIPAS, que cuenta con más de 500 socios, lleva dende’l 1976 defendiendo los porgüeyos del coleutivu de persones con diabetes d’Asturies ante les alministraciones públiques y privaes, arriendes de facer por meyorar el conocimientu y convivencia cola diabetes a traviés d’aiciones d’espardimientu, educatives y d’arruelu.
Pente les actividaes qu’entama ASDIPAS pa meyorar la calidá de vida de los que carecen diabetes destaca’l campamentu educativu de branu pa neños y adolescentes diabéticos.
Llucía F. Marqués
This work is licensed under a Creative Commons Attribution 4.0 International License.
