Otorgando’l so Premiu de la Concordia 2017a la XE, los Princesa d’Asturies apurren otru argumentu pa refugalos, que se suma al gastu públicu y a la esibición d’españolismu monárquicu, refugaos añu tres añu en concentraciones ciudadanes

Los premios Princesa (anantes Príncipe) d’Asturies xeneren fonda refuga pente la ciudadanía asturiana, como demuestren les multitudinaries manifestaciones qu’acompanguen la entrega de premios añu tres añu. Esta edición habrá un motivu más pa sentise ofendíos: la concesión del Premiu a la Concordia a la Xunión Europea

El galardón pretende reconocer a persones o proyeutos cuya llabor “contribuya, de manera estraordinaria y a nivel internacional, a la defensa y xeneralización de los drechos humanos, al fomentu y proteción de la paz, de la llibertá, de la solidaridá, del padrimoniu mundial y, en xeneral, al progresu de la humanidá”.

Pa entamar podría paecer estraño qu’una asociación que ñació y se desendolcó alrodiu d’intereses económicos seya la escoyía pa recibir esta triba de premios –nun escaezamos que nel 2.012 recibió’l tamién polémicu premiu  Nobel de la paz- Echando una güeyada a la composición del xuráu –banqueros, empresarios, políticos ya otros esponentes del entramáu más capitalista español- entiéndese meyor.

El premiu reconoz-y a la XE el contribuir a esparder “valores como la llibertá, los drechos humanos y la solidaridá”. Nuna Europa ca vegada más mancada poles desigualdaes sociales, que recorta drechos y llibertaes, que vive anguañu un xorrecimientu esponencial de la xenofobia y protagoniza dalgunes de les mayores esportaciones d’armes, esti premiu, propuestu pol socialista uvieín Jonás Fernández, nun dexa de tener el so toque surrealista.

Nel so llabor diariu la X.E. permite –cuando non favorez- la conversión del Mar Mediterraneu na mayor fosa común de la Tierra, imponiendo rutes mortales a les persones que migren, permitiendo la desapaición de más de 10.000 menores en territoriu européu a manes de les redes de trata, invirtiendo cada vegada más perres en valles, muries ya otres cadarmes “de seguridá”, dende les que se dispara a xente cuyu delitu ye tratar de ponese a salvu. Entantu, fuera d’ella, diez de los países más probes del mundiu acueyen a cuasi la metá de los 65 millones de refuxaos del planeta, un másimu hestóricu.

Los galardones, que cuenten con una sovención de 250.000 € del Ayuntamientu d’Uviéu aprebada por Somos ya IU nel gobiernu xunto col PSOE, serán entregaos el prósimu mes d’ochobre nel Teatru Campuamor d’Uviéu, nuna ceremonia presidía polos Reis d’España, nuna nuea esibición d’españolismu monárquicu.

Llucía F. Marqués

This work is licensed under a Creative Commons Attribution 4.0 International License.