Una carta abierta del señor Gaspar Llamazares d’IX Asturies a Podemos, pidiendo desplicaciones pol recursu d’inconstitucionalidá presentáu por Xuníos Podemos contra’l cambéu de la Llei de Montes asturiana espertó la indignación de los ecoloxistes
Dende la Coordinadora Ecoloxista d’Asturies quixeron esclariar una serie de cuestiones al respeutu, yá que na so opinión delles afirmaciones que’l diputáu d’IX, Gaspar Llamazares, fai nel so escritu nun se correspuenden cola realidá.
En primer llugar apunten a que nun ye cierto que Podemos Asturies s’astuviére nel cambéu de la Llei, yá que Podemos votó en contra.
Na so carta, Llamazares fala de “ampliu consensu social a a favor del llevantamientu de los acotamientos al pastoréu”. Sicasí, de los 87 comparecientes que pasaron pol Parlamentu asturianu, incluyendo representantes del sector ganaderu, forestal, téunicos, sindicatos, profesionales n’estinción de quemes, profesores universitarios, biólogos, guardes, empreses madereres, propietarios forestales, empreses y cooperatives forestales, ecoloxistes ya otros espertos , más del 95% amosáronse contra’l cambéu de la Llei.
Especialmente relevante ye’l dictame en contra del cambéu del Conseyu Forestal d’Asturies, órganu consultivu y d’asesoramientu al Gobiernu en materia forestal, integráu por 30 miembros que representen a conceyos, profesionales, parroquies rurales, organismos certificaores, ecoloxistes, sindicatos agrarios, Universidá ya otros espertos y representantes de la sociedá civil, tando solo a favor d’esta llei los trés representantes de los sindicatos agrarios.
Na so carta’l señor Llamazares tamién resalva los seies informes téunicu-científicos alvirtiendo de los graves daños ambientales que produciría sobro la cubierta vexetal y los suelos dexar entrar el ganao a pacer nes zones amburaes.
Na C.E.A. ven intencionalidá nel tapecimientu d’información per parte de Gaspar Llamazares y repiten la so reclamación de que se vuelvan a acutar les zones quemaes, como defenden tolos téunicos consultaos, “Porque colos montes y les quemes nun se xuega.”
Redaición InfoAsturies
This work is licensed under a Creative Commons Attribution 4.0 International License.
