SUATEA denuncia qu’esta midida nun va iguar los graves problemes de sobrecarga de trabayu, pal profesoráu y los equipos direutivos qu’esiste nos centros educativos

“La Conseyería vese obligada a mover ficha, tres les movilizaciones del profesoráu, pero pretende faer recayer nes direcciones de los centros la organización de los centros col mesmu númberu de xeres y menos hores pa desenvolveles.” Asina resume’l sindicatu d’enseñantes la nueva decisión de la Conseyería d’Educación, qu’en tratando de convencer a los xubilaos de trabayar de baldre p’amenorgar la enorme carga alministrativa de los docentes, agora propón esti amenorgamientu d’una de les hores complementaries que’l profesoráu asturianu tien de permanecer nel centru tres la salida de los alumnos, otra midía a costu cero de duldosa eficiencia.

Pa que la midida fuera eficiente sedría preciso, per una parte, l’amenorgamientu d’horariu lleutivu y por otra, un plan pa dotar les plantiyes docentes de profesoráu y personal d’alministración de servicios, yá que nestos momentos nos centros educativos multiplicáronse les xeres burocrátiques y de xestión, coincidiendo nel tiempu col mayor retayu de personal de la hestoria del sistema educativu asturianu, con 276 millones menos en gastu educativu.

Cola aplicación n’Asturies del Decretu Wert medraron en dos periodos llectivos y dos complementarios los horarios docentes en Secundaria, incumpliéndose sistemáticamente los alcuerdos de plantiyes en Primaria, lo que traxo un empeoramientu xeneralizáu de l’atención a la diversidá, obligando al profesoráu especialista d’asumir tutoríes, la desapaición de sofitos n’Infantil, etc. “Si a esto añidimos que la implantación de la LOMCE fíxose a base de forzar a los claustros a ellaborar nueves programaciones, a realizar evaluaciones y reválides, a enllenar encuesta tres encuesta ensin utilidá dala, el resultáu pa los centros ye demoledor.”

La reivindicación unánime del profesoráu ye la de recuperar les condiciones llaborales previes a esi retayu, que foi calteníu y agraváu pola actual Conseyería d’Educación.

This work is licensed under a Creative Commons Attribution 4.0 International License.