Na semeya, la Quinta da Fonte, única fastera que sobrevivió a la devastación  de la tarrecible quema de Portugal la selmana pasada: un pueblu salváu polos sos castañales y olivos, arrodiáu d’hectárees d’ocalitos qu’amburaron dafechu

La hestórica llucha contra la invasión de los nuesos montes por especies alóctones de rápidu xorrecimientu, comu l’ocalitu y el pinu, dañibles en sí mesmes polos sos efeutos nocivos sobro’l suelu y sobro la flora y fauna autóctones, tien agora un argumentu de muncho pesu.

Con una orografía bien asemeyada a la de la fastera afeutada pola quema, la’espoxigue de les temperatures, un porcentaxe averáu d’ocupación forestal por especies pirrófites (ocalitos y pinos) y la mesma ausencia de normatives forestales, les condiciones asturianes son bien asemeyaes a les que favorecieron la llaceria.

Poro, la Coordinaora Ecoloxista desixe al “Principado” y a los Conceyos que pongan en marcha una normativa forestal que recueya una distancia de seguridá a viviendes y edificaciones pa los cultivos d’especies pirrófites de non menos de 200 metros de distancia.

Andecha Astur  pronuncióse tamién al respeutu, desixendo amás la conxelación  de la so espansión y la recuperación d’especies autóctones, non agresives col mediu, comu’l carbayu o la castañal, midíes que fueron anunciaes pol gobiernu portugués y que son opuestes a la decisión del gobiernu de Javier  Fernández, que vien d’aprobar el llantáu d’otres 7.000 hectárees d’ocalitos, superficie cola que se taría a piques de superar les 61.300 hectárees previstes nel Plan Forestal Asturianu, por que ye de tarrecer el cambéu del Plan p’amplialo, nun riesgosu apueste pol monocultivu d’ocalitu, en beneficiu de les empreses papeleres.

N’Asturies cuasi’l 20% de la superficie arbolada ta llantada d’ocalitos, algamando concentraciones del 100% en dellos conceyos y alrodiu’l 70% en tola rasa costera d’Oriente a Occidente, que ye onde se concentren la mayoría de los plantíos, siendo especialmente grave en conceyos tan densamente poblaos como; Avilés, Carreño, Corvera, Gozon, Pravía y Castropol.

Llucía F.Marqués

This work is licensed under a Creative Commons Attribution 4.0 International License.