“Branu de compres, branu de regalos” ye’l cenciellu llema cola que la cadena francesa Carrefour anuncia la so promoción braniega, amosando un respetu pola nuesa llingua qu’entá tan lloñe d’amosar les propies empreses asturianes

Si va tres años yera la supercadena d’hamburgueseries Mc. Donald’s la que nos sosprendía usando la nuesa llingua na so campaña Publicitaria “FAME” y el añu pasáu la cerveza portuguesa Bock col so “Beber pa Creyer”, agora ye la cadena francesa  de supermercaos la qu’entama a usar l’asturianu nes sos promociones.

La importancia normalizadora d’estes iniciatives ye descomanada ya qu’aporta en poco tiempu a un perampliu seutor de la población, utilizando la llingua nun ámbetu esternu al llariegu y/o académicu, reforciando la utilidá comunicadora de mases del asturianu.

Per otru llau, la ventaxa pa les empreses que s’anuncien n’asturianu ta nidia: la cercanía que s’algama col veceru al averase a elli na mesma llingua na que medró resuena con más fuercia, ya’l subidón  d’autoestima al sentise respetáu nos sos raigaños ye un bon aliciente pa fidelizar al compraor/a.

Ta por ver si s’esparde l’exemplu, deprendemos un pocu de marqueting y va medrando’l númberu d’empreses, foriates y propies, que nos falen a los asturianos na nuesa llingua. Prestaría, por poner un exemplu, beber más Sidre d’Asturies y menos Sidra de Asturias…

Llucía F. Marqués

This work is licensed under a Creative Commons Attribution 4.0 International License.