L’Asociación d’Amigos del Ferrocarril de Madrid empobina’l Tren de los 80

Dende hai diez años nun circulaba nengún tren nocherniegu ente Madrid y el Cantábricu, pos l’espresu Costa Verde finó los sos viaxes n’avientu de 2007. Agora l’Asociación d’Amigos del Ferrocarril de Madrid pon en circulación un peculiar tren, construyíu con materiales de la década de 1980.

Según señaló Javier Fernández, director del Muséu del Ferrocarril, cola iniciativa «puede recuperase esa manera de viaxar de nueche nun tren acondicionáu pa percorríos llargos, dalgo que se perdió coles llínees d’alta velocidá».

Los casi 200 pasaxeros del Tren de los 80’ procedentes de Madrid, llegaron el vienres, a les 9.30 hores, a Xixón tres un viaxe de diez hores y media. Enantes ficieron una parada en Payares pa esfrutar del paisaxe y l’amanecer.

This work is licensed under a Creative Commons Attribution 4.0 International License.