Figura de significación hestórica tanto a nivel continental como estatal, hai 40 años morrió nel esiliu y hai 80 refugó la implantación de la dictadura franquista
La charra foi impartida pol hestoriador Javier Cubero n’Uviéu, nel Club de Prensa Asturiana del diariu La Nueva España.
Dellos militares carlistas xunto con Carlos VII. El duque Roberto de Parma ye’l primeru pola derecha (1874).
Introducción
Xavier de Borbón-Parma (Italia, 1889-Suiza, 1977), foi’l titular dinásticu del llexitimismo carlista ente los años 1936 y 1975, pero tamién xugo un papel importante demientres les dos guerres mundiales.
Yera ún de los fíos del segundu matrimoniu de Roberto de Borbón-Parma, caberu Duque reinante en Parma hasta la unificación italiana, ya Infante de la Casa Real española, hasta que pola so participación nel Exércitu llexitimista de Carlos VII na Tercer Guerra Carlista (1872-1876), el Gobiernu lliberal de Madrid privó-y d’esa condición como de la ciudadanía española. Por esta razón a lo llargo de la etapa franquista, el Gobiernu como los periódicos afines a Don Juan de Borbón calificaríen a Xavier de Borbón como un “pretendiente francés”.
Realizó estudios militares na Academia d’Artillería de Viena, de Ciencies Polítiques y Económiques na Universidá Católica de la Sorbona, y de Filosofía y Sagrada Teoloxía na Universidá Católica de Lovaina. Tamién yera inxenieru agrónomu.
Los fíos del segundu matrimoniu del duque Roberto de Parma. Xavier ye’l primeru pola derecha (1925).
Primer Guerra Mundial
Al finar los sos estudios empecipia la primera guerra mundial, manifestándose al empar que’l so primu Xaime III, titular dinásticu carlista ente 1909 y 1931, a favor de la República francesa frente al Imperiu alemán. Quiso ingresar nel exércitu francés pero nun foi posible en virtú d’una Llei prohibitiva que torgaba la entrada a los príncipes de la Casa de Borbón. Ingresaría nel exércitu belga, onde ascendería hasta comandante, con títulu de Estado Mayor. Combatió nos frentes inglés, belga y francés, distinguiéndose nes sangrines batalles de Verdún y Chemin des Dames, siéndo-y concedida pol so valor la «Croix de Guerre 1914-1918» de la República Francesa.
Testigu de los sufrimientos que ocasionaba el conflictu bélicu, y ante la perspectiva d’una prolongación indefinida, Xavier y el so hermanu mayor Sixto, retrucaríen al llamamientu del Papa Benedicto XV en pro de la paz. Nesi sentíu intentaríen negociar ente los aliaos y Austria una paz separtada que obligase a Alemania a finar la guerra.
El Gobiernu de Viena foi favoratible al alcuerdu, sofitáu pola emperatriz Zita d’Austria, hermana de los dos príncipes de Parma, pero una indiscreción de Clemenceau, xefe del gobiernu francés, al falar del proyectu col ministru italianu Sonnino, supondría el so fracasu.
Esta aventura foi reconstruyida munchos años más tarde demientres la década de 1990 nun episodiu de la serie de televisión El Xoven Indiana Jones, siendo los actores que representaben el papel de los príncipes Parma los coprotagonistes del episodiu. Pero por motivos desconocíos, na versión en llingua castellana de la Televisión Española, nun se mencionen los nomes y apellíos d’estos dos príncipes.
Llibru sobre la so esperiencia nel campu nazi de concentración de Dachau.
Segunda Guerra Mundial
Al iniciase la segunda guerra mundial en setiembre de 1939 foi movilizáu’l exércitu belga. Al ser invadida Bélxica poles fuercies del Tercer Reich alemán, Xavier de Borbón s’incorporaría como comandante d’artillería nel Estáu Mayor de la IV División, y al producise el desastre militar aconseyó al rei Lleopoldo que colase a Inglaterra, retirándose él a les llínies de Dunkerque.
Cuando la Italia de Mussolini entró na guerra, el gobiernu fascista le confiscó los sos bienes por consideralo un italianu (pol so llugar de nacencia) al serviciu del enemigu. La prensa española espublizó la noticia col envís de desacreditalo.
Dempués de la victoria alemana sobre Francia se tresllada cola so familia a San Xuan de Lluz, onde ta diez días, y una vegada que los exércitos alemanes lleguen hasta ehí, marcha a Pau dende onde pensaba dir a Portugal, pero le foi denegáu’l permisu de pasu por territoriu español pol gobiernu de Franco; namás foi autorizáu’l pasu a la so madre, la so hermana Zita y otres señores de la so familia, pero llindáu únicamente a tres díes. Xavier de Borbón se treslladaría a la fastera central de Francia, fora del área d’ocupación alemana.
N’avientu de 1940 ye requeríu por Churchill, primer ministru de Gran Bretaña, y Pétain, xefe d’estáu del régime de Vichy, pa que participe na negociación secreta que se taba efectuando ente los sos respectivos gobiernos; negociación que concluyó nunos pactos conocíos como «los alcuerdos Halifax-Chevalier». De común alcuerdu foi designáu árbitru na aplicación d’esi conveniu, gracies al cual los barcos franceses pudieron siguir tresportando alimentos a Francia nesti períodu d’escasez.
Les sos primeres actividaes cola Resistencia consistieron en tapecer na biesca del so castillu a los xóvenes franceses que escapaben de los nazis pa nun ser deportaos a Alemania onde trabayaben ensin nengún salariu na industria alemana. Más tarde, una vegada que los alemanes entraron na Francia non ocupada, pasó a dirixir la Resistencia na rexón d’Allier y personalmente mandaba un maquis de 120 partisanos.
Nes lluches del branu de 1944, poco dempués del desembarcu aliáu en Francia, foi deteníu. Yera’l 22 de xunetu de 1944. Foi conducíu a Vichy onde permaneció un mes na carcele de la Gestapo, siendo condergáu a muerte acusáu de terrorista, comunista y axente inglés.
La demora de la sentencia pa dar a la so execución idéntica forma que la sofrida por un oficial alemán, víctima d’otru maquis, permitió la intervención de Pétain, visitáu pola esposa de Xavier de Borbón, ante’l mandu militar alemán pa que saliera de la carcele de la Gestapo y pasase a la xurisdicción ordinaria militar.
De Vichy foi treslladáu a la carcele de Clermont-Ferrand onde foi clasificáu como prisioneru oficialmente desapaecíu siendo marcaes les ropes coles lletres NN. Xunto con otros prisioneros ye conducíu al campo de esterminiu de Natzweiler asitiáu n’Alsacia. Pero la prosimidá de les tropes aliaes provocó la evacuación d’esti campu y el so treslladu a Dachau.
El tren que los llevaba foi bombardeáu y nel incendiu foron quemaes les fiches de los deteníos, colo cual los alemanes, perdieron por un tiempu la so llocalización. Reconocíu en Dachau, foi salváu pol incendiu provocáu nos ficheros del campu por unos republicanos españoles que tamién taben ehí.
Foi nuevamente identificáu meses más tarde, pero yá nun momentu en que a los alemanes les interesaba caltener como rehenes a personalidaes importantes. Ante’l avance de les fuercies americanes en Baviera, Dachau foi evacuáu, y va ser teaslladáu a Prax nel Tirol, xunto a prisioneros importantes d’otros campos, como’l dirixente socialista León Blum, que nes sos memories al esplicar esos momentos lo cita de la viniente manera: “el Príncipe Xavier (…) del que daprenderemos a amar la sencillez perfecta y la bondá (…) que se llevantó n’armes contra la Gestapo”.
L’ochu de mayu de 1945 tropes americanes procedentes d’Italia consiguieron lliberar al grupu de rehenes. La noticia de la lliberación va ser cellebrada con allegría polos carlistes, por embargu en Pamplona tres l’actu relixosu desendolcáu na Catedral hebo una carga de la Policía Armada contra los carlistes, que derivó nun tiroteu mutuu, con nueve policíes y trés carlistes ferios, seis (cuatro policíes y dos carlistes) d’ellos por arma de fuéu. Posteriormente hebo 103 carlistes deteníos.
This work is licensed under a Creative Commons Attribution 4.0 International License.
