Los catalanes presenten la llei del referéndum, que prevé un procesu costituyente si gana el ‘sí’  que finará cola redaición de la Costitución Catalana; entantu España continúa retrucando con menacies

Depués de reiteraos intentos de presentar el proyeutu de llei de forma alcordada col Estáu redactase esta norma que sedrá “la ferramienta pa l’exerciciu del drechu d’autodetermín, que ye un drechu que los catalanes tienen como pueblu y que ta reconocíu internacionalmente. Ye un drechu que tenemos como país y que ye inalienable, irrevocable ya imprescindible. Tenemoslu y poro exercemoslu”

La  llei del referéndum sofítase nel conceutu interncional del drechu d’autodetermín reconocíu na Corte Internacional de Xusticia de 2010 asina como na ONU y polos tribunales de l’Haya; tamién forma parte del ordenamientu xurídicu español, en tantu son trataos internacionales soscritos pol Estáu español.

La votación sedrá veceyante, acordies la norma que regula la cellebración de la consulta del 1-O y en casu de que salga el ‘sí’ a la independencia  el Parlamentu catalán tendrá un plazu másimu de 48 hores dende la proclamación de los resultaos pa proclamar la independencia.
Gabriela Serra (CUP) indicó na so intervención que “si nun fuere un referéndum veceyante nun habría llibertá y soberanía” y afirmó que se trata de “un actu de desobedencia, pero tamién ye un actu de coherencia, porque da respuesta a un mandatu que nos fizo la ciudadanía”.

La llei del referéndum recueye tamién que si la opción que gana na consulta ye la contraria a la independencia, deberán convocase elleiciones autonómiques darréu.

Como contraposición a esti procesu democráticu y venceyáu a drechu, tenemos les declaraciones en tonu de menacia de la vicepresidenta del Gobiernu español Soraya Sáenz de Santamaría “al Estáu algamen-y 24 hores pa paralizala” y les de Maria Dolores Cospedal, remembrando que les Fuerzas Armaes tan pa “protexer la integridá y la soberanía d’España”

Llucía F. Marqués

This work is licensed under a Creative Commons Attribution 4.0 International License.