La conseyería d’Educación reconoz la especial dificultá del trayeutu fasta’l colexu d’El Villar, y comprométese a caltener el serviciu de baldre a tolos escolinos

Desque na Asociación  de Pas y Mas tuvieron conocencia del retayu nel serviciu d’autobús, a finales del cursu pasáu, nun pararon de movese para evitar qu’en setiembre los sos fíos se vieren ensin tresporte. Numberoses manifestaciones y xuntes aidáronlos a consiguir el sofitu del Conceyu Uviéu, que los acompangó nes sos negociaciones cola Conseyería d’educación, que se comprometió a afaer les rutes pa que tolos escolinos , seique vivan a menos d’un kilómetru y mediu de distancia , tean asegurada la plaza. Eso sí, la solicitú de cobertoria esceucional va tener que solicitase cada cursu.

Les families, que permanecieron a les puertes de la Conseyería mientres duraba la xunta, amosáronse “satisfeches”, anque creen que “en ciertu mou, ye un parche tener qu’alegar cada cursu lo mesmo en tan curtiu plazu de tiempu” y insiten  en que’l tresporte pa toos ye un drechu que cola solución provisional queda nel aire cada cursu.

Amás esa autorización queda supeditada a qu’haiga places llibres nes rutes “y nel casu d’El Villar delles yá tán enchíes”.

El preslle’l Colexu de Sotu crea un entueyu adicional, cuidao que se va facer necesario crear una nueva ruta que recueya a los sos antiguos escolinos pa llevalos a El Villar, daqué a lo que se comprometió’l director del Consorciu de Tresportes, quien tamién prometió estudiar la necesidá de refacer les rutes de manera que toles solicitúes seyan atendíes.

Llucía F. Marqués

This work is licensed under a Creative Commons Attribution 4.0 International License.