La programación cultural del Festival Arcu Atlánticu, que va cellébrase na ciudá del 25 al 30 de xunetu prósimos, propónmos esti añu alcontramos col variáu mapa llingüísticu de la mariña Atlántica

Asturies forma parte del corpus cultural ya históricu Atlánticu, mar que siempres foi la so cimera vía de comunicación con otros pueblos, colos qu’amás comparte fondos raigaños. Les barreres xeográfiques y culturales coles civilizaciones del interior entornaron a estos pueblos escontra’l mar, xenerando un intercambiu y una comunicación costante que dexa identificalos, entá anguaño, como una xunidá.

Dedicando ca díi a una llingua o familia d’elles el Festival Arcu Atlánticu propón un averamientu a los territorios y a les situaciones que viven les llingües minoritaries europees atlántiques, que conviven coles grandes llingües de comunicación internacional como’l francés o l’inglés, sobreviviendo a sieglos d’homoxeneización cultural y llingüística. Quier resaltase asina la especificidá cultural del Arcu Atlánticu, ya’l tiempu la de caún de los territorios que lu componen, nos que l’elementu más destacáu ye precisamente la esistencia de llingües propies.

Llingües como’l bretón, l’occitanu, l’euskera, el Gallego, el frisón holandés, el baxu saxón alemán, el galés, el gaélicu escocés o’l gaélicu irlandés  comparten problemática col asturianu. Munches d’elles, comu asocede col nuesu idioma, son llingües minorizaes; toes son a lo menos “minoritaries”  pero perviven nes sos respeutives nacionalidaes gracies al sentimientu identitariu de los sos falantes, que lluchen por caltener la so cultura y raigaños.

El Festival Arcu Atlánticu de Xixón ye un eventu cultural que naz en 2012 y qu’aspira a ser un proyeutu integraor y polifacéticu que xuna les estremaes árees culturales y creatives,  cola cuenta d’establecer una cooperación estable y caltenible con otros territorios del Arcu Atlánticu.

Redaición InfoAsturies

This work is licensed under a Creative Commons Attribution 4.0 International License.