El próximu domingu 23 de xunetu, -y los díes previos como “entrenamientu”-, los aviones del exércitu español cruciarán l’espaciu Aereu xixonés nuna esibición de fuercia militar, contaminante acústica y atmosféricamente, tremendamente costosa y que dexa nel aire un tastu a menacia
Cientos de presones protagonizaron un percorríu pela Selmana Negra, saliendo de la Jaima Saharaui, p’amosar la so refuga a la cellebración del XII Festival Aereu de Xixón. Nel pasucais, nel que reclamaron los gastos militares pa fines sociales, resaltóse’l fechu de que los aviones de la esibición nun son más que “maquines de matar” y que “amosales como un espeutáculu folixeru nun persigue más que la normalización de la maquinaria de guerra y la militarización de la nuesa sociedá”.
Remembraron tamién que’n Xixón les espresiones populares y espontánees de música nes cais –comu puede ser tocar la gaita- ye motivu de sanción “por ruíos” entantu que decenes d’aviones diseñaos pa la guerra franciendo la barrera’l soníu nun paecen estorbar.
El Festival Aereu de Xixón cuenta con un presupuestu desconocíu, apurríu por instituciones públiques y privaes, que tien como fin últimu la normalización ente la población d’estes máquines de matar, utilizaes en multitú de conflictos bélicos en tolos puntos del planeta pa segar vides humanes y afianzar los porgüeyos del sistema, herederes de los mesmos aviones españoles que sobrevolaron y bombardearon Xixón, pente otres poblaciones asturianes.
Redaición InfoAsturies
This work is licensed under a Creative Commons Attribution 4.0 International License.
