Pinchazu pa los dos Ferrari na última vuelta / Fórmula 1
Cuarta victoria consecutiva pa Hamilton en Silverstone
Esti fin de selmana foi en Silverstone’l GP Británicu, penúltima carrera enantes del parón de Branu. Na clasificación Hamilton algamó la pole y los dos Ferrari completaben el podiu.
Ya enantes d`entamar la carrera, na vuelta de formación, Palmer abandona por problemes de fiabilidá nel Renault. Tuvieron que dar otra vuelta de formación y finalmente entamó la carrera. Na salida paecía que Vettel tenía problemes y finalmente perdió posición con Verstappen. Na segunda vuelta los dos Toro Rosso tuvieron un choque por culpa de Kvyat, lo que fizo que`l madrilanu quedará fora de carrera y bastante enfadáu col so compañeru.
Ya sabíamos qu`esti yera un circuitu de Mercedes, y de Hamilton. Pero ye qu’esta cuarta victoria consecutiva de Hamilton en Silverstone foi llimpia y ensin rivales pa él. Bottas, pel otru llau, salía novenu pola penalización que tenía, pero tuvo lluchando tola carrera y algamó una brillante segunda posición gracies a los problemes de neumáticos de Ferrari.
Los dos Force India siguen colos bonos resultaos y con llucha ente ellos; Ocon octavu y Pérez novenu. Un puntu pa Massa, qu`esti añu nun ta algamando bonos resultaos en Williams, y xusto detrás l’únicu McLaren que terminó la carrera (Vandoorne) y que marcha ensin puntos tamién güei.
Llucha ente Bottas (Mercedes) y Vettel (Ferrari)
Na vuelta 42 el pilotu de Mercedes algamaba`l coche del so rival y facía’l primer intentu d`adelantalo. Vettel defendía posición de forma mui agresiva y aguantaba una vuelta más. Lo impresionante vino na siguiente vuelta cuando en recta Bottas tiraba de rebufu y de DRS, demostrando la potencia que tien`l so coche, y adelantaba ensin nengún problema al alemán. Insisto, anque esti añu si hai llucha pol campeonatu, Mercedes sigue un pasu per delantre.
Na última vuelta vino un cambéu inesperáu na carrera, porque tanto los dos Ferrari como Verstappen nun calcularon bien la durabilidá de los neumáticos y sufrieron pinchazos. Too entamó con un pinchazu de Raikkonen, que perdía entós la segunda posición na que llevaba tola carrera. Unes curves más tarde Vettel tenía’l mesmu problema (terminaría algamando na más la séptima posición, una pena pa él) y finalmente tamién el pilotu de Red Bull Max Verstappen (Ricciardo tuvo qu`aparar por si acasu enantes de sufrir un pinchazu).
En dos selmanes ye`l próximu GP, nesti casu’l d’Hungría, y l’últimu enantes del parón de branu d`un mes. Recordámoste que pues siguir tola actualidá de la F1 en twitter @F1Nast
This work is licensed under a Creative Commons Attribution 4.0 International License.
