La popularmente conocida como “ayuda de la probitú enerxética” recibió l’añu pasáu cuasi 3.000 solicitúes de families que nun pueden faer frente a les factures de la lluz ya’l gas
Esta convocatoria tien como oxetu regular la concesión d’Ayudes económiques pa l’abonu de gastos de suministru d’enerxía de la vivienda avezada correspondientes al periodu del 1 de xineru al 31 d’agostu de 2017. Va consistir nun sofitu económicu que s’abonará nun pagu únicu, por un importe másimu de 350,00 euros por unidá de convivencia, nun pudiendo superar el gastu en suministru d’enerxía xustificáu.
Les persones solicitantes tendrán d’apurrir la so solicitú nos rexistros de los Cientros Municipales Integraos del Conceyu de Xixón o de los Cientros de Servicios Sociales que-yos correspuenda pol so llugar de residencia. El modelu de solicitú va poder atopase nos citaos Centros y na páxina web municipal (www.gijon.es) na sección Descarga de Formularios.
Magar estes ayudes son imprescindibles para caltener un nivel de vida mínimamente dignu para munches families, dalgunes entidaes como la Plataforma d’Afeutaos pola Hipoteca d’Asturies y Andecha Ástur valoren qu’esti tipu de midíes nun constitúin en si mesmes una solución, una y bones lo que los asturianos quieren ye tener los medios para ganase la vida ensin depender d’esta triba d’ingresos. “Especialmente esmolecedor ye’l fechu de que creza’l númberu de families que precisen d’estes ayudes inclusive trabayando, lo que ye un claru indicador del nivel de precariedá llaboral que se consiente n’Asturies. Nun ye t´probitú llaboral, ye probitú a cencielles” aporfia Arturu Xosé Bermeyu, Secretariu Xeneral d’A.A.
El plazu de presentación abrióse va dos díes y sigui fasta’l 15 de setiembre de 2017, incluyíu.
Llucía F. Marqués
This work is licensed under a Creative Commons Attribution 4.0 International License.
