Malpenes va un mes que’l Conceyu Llaviana aprebaba una Ordenanza Municipal d’Usu de la Llingua Asturiana. Agora istala cartelos indicativos nuevos nos que s’emplega namái’l castellanu
En dellos puntos del conceyu Llaviana vienen d’estrenase cartelos nos que podemos lleer “Ayuntamiento”, “Centro de Salud”, “Registro de la propiedad”, “Hogar del Pensionista” o “Colegio Público Elena Sánchez Tamargo” son dalgunos exemplos de la nuea señalización, toos ellos n’español dafechu. Esto choca de frente col teóricu sofitu istitucional a la llingua asturiana declaráu va pocu pol equipu gobiernu, que firmare va un mes la so Ordenanza Municipal d’Usu de la Llingua Asturiana.
René Durán, el mesmu polesu que propuso les ordenances del asturianu fizo denuncia del fechu nun escritu ante’l rexistru del conceyu. Ta por ver que midíes tomará la comisión de siguimientu costituyida nes ordenances pa xixilar el so cumplimientu.
Tres del aparente avance de los drechos llingüísticos en Llaviana, esti fechu nun fai sinón amosar que na tema l’asturianu les medies tintes nun valen pa na y qu’entantu que nun se mos reconoza la oficialidá siguiremos tando indefensos.
Llucía F. Marqués
This work is licensed under a Creative Commons Attribution 4.0 International License.
