La Conseyería d’infracadarmes, Ordenación del Territoriu y Mediu Ambiente foi denunciada por encubrir l’alta contaminación por bencenu que carecen los vecinos d’Uviéu

La Fiscalía de Mediu Ambiente del Tribunal Superior de Xusticia d’Asturies vien d’almitir a trámite la denuncia interpuesta pola Coordinadora Ecoloxista d’Asturies frente a la Conseyería d’Infracadarmes.

La falta de midiores oficiales fizo difícil afitar daqué que ya s’albidraba hai años: dica l’ún de xunetu de 2.016 la única estación que controlaba esti canceríxenu contaminante allugábase en Ventanielles, apurriendo d’avezu datos con picos esmolecedores de bencenu, ensin que se supiere l’orixe.

La colocación d’un sensor de bencenu na estación de control de la contaminación de Trubia –al par de  les Piscines Municipales- permitió recoyer datos más fiables y comprobar que la contaminación midía en Ventanielles procede de Trubia, llevada pelos vientos. Esto implica que la contaminación afeuta a un ampliu territoriu alrodiu de los focos d’emisión.

Los valores recoyíos en Trubia son especialmente llamativos, superándose con muncho les llendes másimes anuales aceutables pa la salú humana, que la OMS afita en 1,7 µg/m3, frente a la media anual  de 7,77 µg/m3 recoyida n’Uviéu. Arriendes d’ello, sábese que l’allugamientu del midior nes piscines nun ye la más afayaiza, ya que la campaña de control del mes d’abril amosó puntos onde la contaminación midía superaba fasta 4 vegaes la de les piscines.

L’acusación d’ocultación intencionada de datos susténtase na falta de publicidá de los datos apurríos pola estación móvil, colocada nel taller de Munición de Trubia en periodos aleatorios nos años 2.012 y 2.013, con una media  de bencenu de 6,9 µg/m3, y na rodalada d’ Industries Doy, ensin que se conozan los datos, lo fai camentar que’l “Principado” conocía la gravedá del problema dende va años.

La CEA denuncia que, pesi a conocese la situación va cinco años, nun se tomaron dales medies pa que se rebaxasen los peligrosos niveles contaminantes que carecíen los vecinos d’Uviéu ya’l so alrodiu. Foi namás el 12 de xineru d’esti añu cuando, presionaos poles continues denuncies ciudadanes, el “Principado” desixe a les empreses que se tomen midíes. De resultes a esta amonestación los niveles medios baxen, pero calteniendo grandes picos y continuando perriba de la media afitada pola OMS.

Llucía F. Marqués

This work is licensed under a Creative Commons Attribution 4.0 International License.