David Castañón – www.lesfartures.com – @lesfartures
A contrasén de lo que munchos dicen, yo sí creo que la creación de la Sidra DOP Vasca ye positiva. Los asturianos, solemos ser asina, nun faemos nada hasta que vemos l’amenaza (y dacuando nin eso).
Llevamos años vendiendo “Spanish Cider” nel esterior ensin pescancianos que tamos faciendo publicidá de baldre a la sidra vasco, ello ye qu’enforma la nuesa sidra confúndese cola d’ellos.
Casualidaes o non, dende l’anunciu de la creación tuvimos 3 noticies fundamentales al respeutive la Sidra Asturiano DOP.
1. Ampliación de les variedaes de mazana almitíes na DOP. Pasamos de 22 variedaes a 76, con un llabor pergrande de trabayu d’años per parte’l SERIDA yá’l Conseyu Regulador de la Sidra. Envalórase que n’Asturies tenemos unes 5000 variedaes autóctones de mazana, de les cuales, unes 400-500 son variedaes de sidra. Acutar solamente a 22 la ellaboración de nuesa DOP lo único que consiguía yera llindar la capacidá del llagareru pa buscar nuevos sabores y pescudar nuevos caminos (o recuperar los tradicionales).
2. Unión cola Marcar Sidra d’Escoyeta / Sidra de Selección. El sentíu común dacuando imponse. La inclusión de los Llagares Trabanco, Muñíz, Foncueva y Peñón namás puede traer bones noticies a la DOP Sidra d’Asturies. Amás d’estos, incorpórense, La Llarada, JR, Viuda de Corsino y Frutos. Que los llagares apuesten pola nuesa DOP, onde, amás de garantizar que la mazana sía 100% asturiana, garantiza un control públicu y calidá nel productu, ye’l meyor emburrión posible pa la nuesa sidra. Esti emburrión favorez al consumidor, al llagareru, al dueñu la pumarada y a la economía asturiana. Vamos Pasar de 1,9 a 3,5 millones de botelles DOP, inda llueñe de los 40 millones que producimos. Esperemos que los consumidores respondamos y la cifra vaiga creciendo.
3. Retomar la iniciativa pa que la UNESCO declare la nuesa Sidra como Patrimoniu Inmaterial de la Humanidá. Tres unos años de dexadez per parte los nuesos políticos (¿suénavos?) paez que se retoma l’interés pa consiguir la reconocencia, non namás a la nuesa sidra, sinón a la cultura d’un país alredor de la so bébora. Tenemos una tradición ancestral ellaborando sidra, qu’apenes variaron les meyores tecnolóxiques y una forma única nel mundu de tomala, que ye l’escanciáu. Echar. Un simple xestu que nos sirve de símbolu internacional, un xestu que s’entiende dende Taramundi hasta Australia y qu’esanicia cualesquier barrera idiomática o cultural nel mundu. Y eso pueden dicilo mui poques cultures. Sidra ellabórase en casi cualesquier parte del mundu (inclusive onde apenes hai mazanes), pero namás échase l’asturiana.
Tenemos un potencial motor económicu enorme alredor de la nuesa cultura. Y unos políticos empeñaos en desprestixala. Nun se trata de ponela percima d’otres, trátase de da-y el valor que se merez, n’honor de los nuesos güelos y por respetu a los nuesos nietos. ¿Taremos al altor?
This work is licensed under a Creative Commons Attribution 4.0 International License.
