Mientres n’Asturies se presllen sistemáticamente los pozos mineros, n’Alemaña ponen per delantre la rentabilidá social y protexen a los sos mineros

El plan estatal que los sindicatos mineros xermanos presentaron na conferencia mundial del seutor asegura’l puestu de trabayu a alredor de 15.000 mineros, al planear una estracción de carbón de 180 millones de tonelaes de magar l’añu 2019. Claro que na minería alemana nun se conocen casos asemeyaos al d’Asturies onde los dirixentes sindicales collaboraren y s’enriquecieren col preslle de les mines, como ye’l conocíu casu de Villa y tantos otros.

Otros estaos europeos, como Polonia, Bulgaria o Rumania yá punxeron en marcha midíes asemeyaes, calteniendo firme’l so apueste pol carbón como mediu pa xenerar, non solo producción y rentabilidá económica, sinón sobremanera puestos de trabayu.

La decisión de priorizar el nivel de vida de los ciudadanos de les zones mineres sobro –duldosos- argumentos de rentabilidá económica contrasta llamativamente colos planes que’l Gobiernu español y los grandes sindicatos mineros tienen pa la amoriante minería asturiana, daqué que pon nuevamente n’evidencia la falta d’interés del executivu estatal na recuperación asturiana.

Dende Andecha Astur reiteren que’l problema de la minería asturiana ye precisamente esi, que nun ye asturiana, qu’asturiano ye’l carbón y los trabayaores, pero que la direición ta en Madrid, onde remanen los Fondos Mineros y onde ta planificándose un procesu d’esfarrapamientu del texíu productivu asturianu a tolos niveles, siendo la minería, el so desmantelamientu, un oxetivu prioritariu pa ellos. “Europa ye la esculpia, España ye la responsable”

Llucía F. Marqués

This work is licensed under a Creative Commons Attribution 4.0 International License.