Los llurdios xeneraron alarma ente los numberosos pasiantes que s’atopaben na redolada’l paséu San Pedro, pol fuerte fedor de les agües residuales na zona ya’l so color

La Coordinadora Ecoloxista d’Asturies volvió llamar l’atención sobro los frecuentes llurdios de suciedá orgánica qu’enllordien les agües del Cantábricu en Llanes. Les agües fecales salen al mar al traviés de la cueva debaxo del Paséu de San Pedro dende va dellos años, ensin que se sepa entá si se trata d’un frayatu o de dalgún tipu de fuga. Los escapes son más frecuentes y abondosos en feches braniegues, posiblemente por cuenta de la sobrecarga del colector debida al aumentu de población en feches de mayor ocupación turística.

Los ecoloxistes fixeron notar la so esmolición pola sablera de Xagó, allegante a la zona onde se producen los arramaos y que cunta con bandera azul pola escelente calidá y llimpieza de les sos agües, cuestión que cuerre peligru peles abondoses agües fecales qu’aporten a les sos veres cuando’l vientu sopla de Nordés.

La reforma de la depuradora col aumentu de la llínea biolóxica nel 2014 nun paez ser abondu pa tratar el volume d’agües residuales de Llanes, una y bones el conceyu multiplica la so población estos meses de branu ensin que’l tratamientu de les agües residuales s’adaute a esti aumentu.

This work is licensed under a Creative Commons Attribution 4.0 International License.