El 16 de setiembre Cardiff sedrá l’escenariu nel que los galeses abordarán el tema de la independencia a traviés de la poesía, el canciu, el teatru, talleres, humor y charres
Lloñe del marcáu ambiente reivindicativu y politizáu al que tamos avezaos nos actos nacionaliegos, ya ensin la presión mediática en contra, los galeses planteguen un “Indifest” pola independencia, “de bon rollu”, con actuaciones asgaya, xuegos y participación de toles estayes del arte, nel que participa bona parte de la sociedá galesa “Lo más abegoso foi alcontrar espaciu pa que participaren tolos que queríen formar parte d’esta folixa” dicen los organizaores, ante l’avalancha d’ufrimientos d’artistes y conferenciantes naguando por formar parte d’esti díe.
El festival, que tien un coste de 10 llibres la entrada, sedrá una collaboración pente Yes Caerdydd y Barefoot Rascals Day, quienes ya plantegaren cellebrar nesa fecha el “espíritu rebelde” galés. Nelli los organizadores conviden a esplorar los posibles caminos pa tornase’n nación independiente nun ambiente folixeru, a traviés de la poesía, el canciu, el teatru, talleres, humor y charres. Coincidiendo con esa fecha llanzaránse dellos llibros, como los de l’autora Catrin Dafydd’s “Gwales”, y “Yes Cymru”, de la coleición Independencia nel to bolsín.
Na parte cientral del festival el show ‘Gadael Tir’ fadrá un repasu a la historia de les protestes y lluches galeses pola defensa del so territoriu. De fechu, esti show foi’l qu’inspiró a Huw Angle, de Barefoot Rascal Day y un de los cabezaleros organizaores, a entamar esti festival.
Sandy Clubb, Presidenta de Yes Caerdydd, amosóse emocioná cola organización del Festival, que llevaben planeando hai tiempu. “Non solo tenemos fantásticos artistes de primer llinia, músicos y conferenciantes, sinón que toi’l festival ta enllenu d’un sentimientu creativu y prestosu que lu fai vraeramente divertíu”
Llucía F. Marqués
This work is licensed under a Creative Commons Attribution 4.0 International License.
