El 40% del gastu en prestaciones sociales de tol Estáu español ye na CAV

La Renta de Garantía d’Ingresos (RGI) ye dende hai años un ellementu central de les polítiques sociales del gobiernu de la Comunidá Autónoma Vasca. Cola única esceición de la Comunidá Foral de Navarra esta esperiencia ta siendo ignorada poles demás alministraciones del Reinu d’España, que ye l’Estáu miembru de la Unión Europea que menos invierte nesta materia.

Sicasí, la RGI vasca ye equivalente a los sistemes de protección más avanzaos que pueden atopase n’otros países europeos. Na actualidá, el Gobiernu vascu ta estudiando una reforma pa que’l sistema siga siendo caltenible, anque diversos sectores amosáronse críticos por considerar que pue significar un retrocesu.

A nivel estatal, la RGI vasca destaca en tolos sentíos frente a les rentes mínimes d’otres comunidaes. Por casu, el gastu añal por habitante nesi conceutu ye de 223,06 euros na CAV frente a los 99,75 de Navarra, los 18,87 de Madrid, los 23,23 euros de Cataluña o los 6,45 euros de Valencia.

This work is licensed under a Creative Commons Attribution 4.0 International License.