Los datos recoyíos por Adecco sobro’l mercáu llaboral n’Asturies debuxen un escenariu probe n’empreses, escasu en contratos y con predominiu de los emplegos de baxa cualificación

Con una media salarial asturiana calculada en 1.634 euros mensuales, podría paecer qu’a los asturianos nun mos va tan mal… pero si miramos el restu de los datos, con alredor d’un 80% de los trabayadores que nun algamen  a mileuristes, cuasi la metá de los paraos con más de dos años desemplegaos, menos  de trés empreses por cada 100 habitantes –empreses con una minúscula media de 14 emplegaos- una tasa d’emigración alarmante y miles de families dependiendo d’ayudes sociales pa sobrevivir, los datos paecen abondo peores.

Caltenemos, eso si, un  envidiable porcentaxe de xubilaos, como correspuende a una de les rexones más avieyaes d’Europa, con una pirámide de población dafechu invertida, daqué que puede desplicar la desigualdá salarial espeyada enriba.

El problema paez tener mala solución, yá que magar que n’Asturies el nivel de persones con estudios universitarios ye hestóricamente altu, la tasa d’emplegos cualificaos ye d’un escasu 30,9%  y solo 9 de cada cien emplegaos ta siendo formáu p’ameyorar la so situación llaboral. La resultancia ye qu’un trabayaor altamente cualificáu va tener qu’aceutar un trabayu bien perbaxo’l so nivel de preparación o direutamente dise del país, opción tomada por casi 15.000 asturianos cada añu un continuu sangrase qu’agrava’l problema del avieyamientu poblacional.

Amás, la continua fuga de personal con formación afeuta tamién al nivel cultural mediu, yá qu’anque son munchos los que teniendo opción a emigrar, prioricen el fechu de vivir n’ Asturies al de tener un trabayu meyor remuneráu (o a cencielles, un trabayu), son tamién abondos los que deciden quedase por escarecer de la preparación que-yos brinde una oportunidá llaboral nel estranxeru..

Curiosamente, nel segundu trimestre de 2017 amenorgóse de manera llamativa la conflictividá llaboral. ¿Taremos resignándomos?

Llucía F. Marqués

This work is licensed under a Creative Commons Attribution 4.0 International License.