Anque nun foi posible contabilizales con esactitú, los vecinos aseguren que fueron dellos los pexes muertos que pudieron vese llexando nel ríu, primero que l’atapecer torgara’l recuentu

El Colectivu Ecoloxista d’Avilés denunció énte’l Gobiernu de Asturies y énte  la Confederación Hidrográfica del Cantábricu un nuevu arramáu d’agües residuales nel riu Arlos , de xuro viniente del colector de les Vegues en Corvera d’Asturies y causáu poles fuertes lluvies, que tuvo de resultes la muerte de dellos exemplares de trucha, daqué especialmente grave considerando que la contaminación del ríu yá abrasara la población piscícola.

Los numberosos pasiantes que percorríen la zona pudieron ver el llurdiu producíu polos arramaos, qu’algamó una estensión de más de dos kilómetros.

Esti nuevu arramáu, sumase a la llarga llista d’episodios contaminantes de los distintos afluentes qu’acaben na ría  d’Avilés.

Apocayá’l Conceyu de Corvera recibiere una multa precisamente por estos repitíos arramaos nel ríu Arlos, causaos por dalgún fallu nel colector que provoca escapes ca vegada que llueve, ensin que se tomaren midíes para correxir el problema, lo que fai tarrecer nueves muertes na temporada de lluvies.

Redaición InfoAsturies

This work is licensed under a Creative Commons Attribution 4.0 International License.