Anque yá se sabía que sedría’l nuevu entrenador dende va dalgún tiempu, Marcelo Chorny entró oficialmente nel equipu nel mesmu actu de presentación oficial de Asturies Motor como’l so nuevu patrocinador
La sede d’Asturies Motor na Corredoria foi l’escenariu escoyíu por esti Concesionariu Oficial de Seat (en La Corredoria y Porceyo) pa presentase como patrocinador oficial del Real Uviéu Rugby , un equipu que cunta con más de trenta años espublizando la práctica d’esti esporte n’Asturies y qu’anguañu representa a la ciudá deUviéu nel Grupu A de la División d’Honor B.
Tres d’un añu difícil, nel que llegó a ver en pelligru la so permanencia na División d’Honor, l’equipu estrena esta temporada, amás de patrocinador, entrenador: procedente del Burgos el téunicu arxentín Marcelo Chorny va ser quien entrene al R.U. Rugby na prósima temporada, con opción a prorrogar el so contratu una campaña más.
Los carbayones depositaron la so esperanza en Marcelo Chorny depués de que llevara al so anterior equipu al puestu de campeón de la categoría con plenu de trunfos: 22 victories en 22 alcuentros na temporada regular. Na so etapa como xugador, Chorny xugó nel Pueyrredón arxentín. Amás foi ‘Head Coach’ de la Seleición de la Unión de Rugby de Mar de la Plata y de la Unión de Rugby del Sur, tantu en senior cómo en xuveniles y tamién en modalidá de Seven. En dambos consiguió l’ascensu.
Nel Dos Santos
This work is licensed under a Creative Commons Attribution 4.0 International License.
