Convidamos a la empresa a esclariar esti puntu y a los sos emplegaos a cuntar la so esperiencia no que cinca al rumor de que la empresa prohíbe a los sos trabayadores l’usu del asturianu nel tratu colos clientes

Dellos trabayaores de la empresa asturiana, que presume de “compromisu cola so tierra”  denuncien que la reciente política d’atención al cliente d’Alimerka yos prohíbe usar espresiones asturianes nel so trabayu. Dalgunos mencionen l’avisu específicu de nun usar l’asturianu, demientres qu’otros recibieron un llistáu d’espresiones y pallabres “prohibies”: Gracies, tallueguin, ta, tarjetina o ta mañana son dalgunes d’elles –como vemos, basta con que la palabra suene llixeramente a asturiano, torgándose l’usu incluso de pallabres disglósiques, como tarjetina, pol so sufixu asturianizante-

Sabemos que resulta surrealista, pero na situación d’acosu na que mos alcontramos los asturfalantes, cualisquier cosa paez creyible, pero non por ello consentible. En casu de confirmase esti nuéu casu de censura llingüística, la empresa recibirá la correspondiente denuncia y daráse aniciu a una campaña de boicot pente los consumidores en defensa de los emplegaos represaliaos.

De fechu, sedría un bon momentu pa pidir a esta y otres empreses asturianes l’usu del asturianu como llingua de comunicación col cliente, puntuando la so conocencia a la hora de facer contrataciones y utilizándolu na so publicidá ya información.

Redaición InfoAsturies

This work is licensed under a Creative Commons Attribution 4.0 International License.