El cefalópodu, qu’apaeció flotando pente los bañistes na mañana d’ayeri, mide unos cinco metros

El peludín foi sacáu del agua polos propios bañistes ya’l CEPESMA (Coordinadora pal Estudiu y la Proteción de les Especies Marines) foi puestu en conocimientu darréu, ya que lo más probable ye que seyan ellos los que finalmente se faigan cargu del animal, que de xuro pasará a formar parte de la importante coleición d’estos animales qu’anguañu s’esponen nel Parque de la Vida (L.luarca). Entantu y non, caltúvose nes meyores condiciones posibles cola colaboración de la xente que taba na playa ya l’equipu de salvamentu, echando-y agua perriba pa frenar la  descomposición y treslladándolu temporalmente a les istalaciones de la cofradía llanisca pa caltenelu en frío.

Los «Architeuthis dux» (peludín) son criatures cuasi mítiques de dimensiones estraordinaries que viven nes grandes profundidaes marines. Los varamientos n’Asturies son especialmente frecuentes: más de mediu centenar rexistraos de magar l’añu  1952.

La esceicional frecuencia d’estos cefalópodos nes costes asturianes débese a la fondura del llitoral astur, especialmente’l Caladeru de Carrandi ya’l Cañón d’Avilés, una fuesa somarina a 7 milles de la costa qu’algama los 4.750 metros de fondura na que les corrientes marines, la orografía y la bayura d’alimentu son óptimes pa la vida del peludín.

Llucía F. Marqués

This work is licensed under a Creative Commons Attribution 4.0 International License.