Namás 11 entidaes presentaron alegaciones a esti procesu, -que tuvo abiertu a información pública’l pasáu añu-, de les que ocho yeren entidaes empresariales, una ecoloxista, una política y el “Principado”

La Ordenanza de Protección del Mediu Ambiente Atmosféricu d’ Uviéu, que tien como oxetivu’l control y amenorgamientu de la contaminación y la proteición del medu ambiente dientro les llendes del conceyu saldrá alantre ensin tener en cuenta nenguna de les seis alegaciones coles que la Coordinadora Ecoloxista d’Asturies pretendía meyorala.

Alegaciones refugaes:

• Propuesta de que s’incluya’l control del golor, como un contaminante mas del aire, ya que les molesties causaes polos golores nun tan regulaes a pesar de ser un contaminante mui avezáu.

“les actividaes susceptibles de producir molesties pola emisión de golores, seya en forma d’emisiones de gases o de partícules sólides o líquides deberán axustase a nun estorbar a los colindantes. Los titulares d’estes actividaes que xeneren emisiones susceptibles d’ocasionar molesties por golores podrán ser requirios, tanto con carácter previu, como una vegada entamada l’actividá, pa qu’evaluen la incidencia, afeutación e impactu xeneraos polos golores nel so entornu.”

• Propuesta de que s’incluya’l que nes “Zones Ambientalmente Protexíes”,  seya necesario un estudiu de detalle de modelización de la contaminación pa la istalación d’actividaes contaminantes
• Propuesta d’inclusión, nel casu  de les instalaciones industriales potencialmente contaminadores, de la desixencia d’utilización del combustible menos contaminante posible, prohibiéndose’l cambiu al fue-oil o pet-coque por mor de la so elevada contaminación.
• Propuesta de desixir una distancia non menor de 500 metros a viviendes  para los fornos destinaos específicamente a la incineración de calabres de persones y animales.
• Propuesta de poner una distancia non menor de 500 metros a viviendes pa les istalaciones de tipu provisional, temporal o definitives  de plantas d’aglomeraos asfálticos, preparación d’áridos, fabricación de formigones y asemeyaos.
• Propuesta d’obligatoriedá d’información pública sobre la calidá l’aire, según los datos apurrios pola Rede Automática de Xixilancia de la Contaminación Atmosférica, tanto pública como privaes a traviés d’Internet, paneles informativos y cuantos otros medios d’espardimientu fácilmente acesible s’estime conveniente. Fasta’l momentu’l “Principado” solo informa na so web de la rede pública, no de la rede Privada, que cuenta con datos más fiables… y negativos

Mesmo asina, los ecoloxistes amuesen la so confianza en que la ordenanza sirva al menos pa que’l Conceyu tome midíes pa salvaguardar la salú de los vecinos d’Uviéu.

Llucía F. Marqués

This work is licensed under a Creative Commons Attribution 4.0 International License.