Pesi a nun dexar conforme a la mayoría pola ruindá de les condergues, la sentencia del casu ye considerada importante pol conxuntu de los partíos, al afitar la culpabilidá de Riopedre
Tres d’un procesu marcáu pola lentitú -7 años y nun finó entá-, los defeutos d’instrucción, la negativa a investigar los casos de corrupción collaterales -munchos de los cuálos chisquen al PSOE y al entós presidente Álvarez Areces- y con tres años per delantre de recursos, la conderga dictada pol xulgáu sosprendi a toos pola so ruindá, al imponese-y al principal imputáu una pena de namás 6 años ya en xeneral penes menores de les pidíes pola acusación ya’l propiu “Principado”,
Sicasí, la mayoría de partíos fai una llectura positiva d’esta conderga, que determina ensin llugar a dubies la culpabilidá del que demientres munchos años foi Conseyeru d’Educación del “Principado” baxo los gobiernos d’Álvarez Areces.
Andecha Astur pidi que l’asuntu nun quedé ehí y reclama qu’Alvarez Areces asuma darréu les sos responsabilidaes polítiques, dimitiendo darréu del so puestu de Senador en Madrid “l’es-presidente del “Principado” que pasará a la hestoria como ún de los mayores responsables del esfarrapamientu económicu, social, medio-ambiental y cultural d’Asturies, tendrá qu’asumir les sos responsabilidaes nesti casu de corrupción, pero tamién tendrá que responder xudicialmente por otros munchos casos, como’l d’El Musel, o’l Casu Villa – Fondos Mineros. Por más que la rede mafiosa-clientelar del PSOE consiga safalu temporalmente de temes como’l del Niemeyer, la so estela de corrupción nun quedará impune.”
Pel so llau Podemos, que califica la sentencia del ‘casu Marea’ como “histórica” ya una victoria de la “xente decente” tamién remembró que Riopedre yera la “man drecha” del espresidente del Gobiernu y actual senador, Vicente Álvarez Areces, que “cola so manzorga facía recortes n’educación”.
IU considera que la sentencia del ‘Casu Marea’ correspuéndese col “duru reproche social a la corrupción funcionarial, empresarial o política, qu’esiste n’ Asturies ” y reclama’l desbloquéu de les lleis anticorrupción.
Llamativa ye la reación del PP que, amosando una ablucante falta d’autocrítica,declaró que “Paez que’l PSOE ta arrodiáu de casos aislaos de corrupción”.
La oposición en pleno coincidió en considerar qu’esta trama de corrupción nun ye única y puede repetise, ya que pesi a los cuatro proyeutos llexislativos propuestos nos caberos años por cuatro partíos estremaos, nun foi aprebada denguna normativa de control – nin la llei de Tresparencia y Bon Gobiernu, nin la de Cuentes Abiertes, la de la Oficina Anticorrupción nin la reforma de la Ispección Xeneral de Servicios -, nun siendo quien los partíos con representación nel gobiernu a aportar a un alcuerdu que permita avanzar.
Redaición InfoAsturies
This work is licensed under a Creative Commons Attribution 4.0 International License.
