Tou preparáu para la sesta Feria Nacional d’Artistes, que va cellebrase en Xixón los díes 9 y 10 de Setiembre
Culture Club defínese como una plataforma ufiertada a los artistes “na que poder esponer el so trabayu énte’l gran públicu de forma direuta y brinda-yos l’acesu, al mercáu del arte. Un espaciu diseñáu pa impulsar y celebrar l’increíble don de la creatividá humana, coneutando persones, arte y teunoloxía pa construyir un futuru de mancomún”
Con esta ambiciosa idega en mente nació va seis años esti alcuentru d’artistes qu’anguañu va axuntar a na menos qu’a 50 artistes, esponiendo más de 500 obres a lo llargo de dos díes intensos nos que s’espera cuntar con non menos de 5.000 visitantes.
La programación inclúi esposiciones, cine, conciertos, conferencies y presentaciones .
La esposición del Palaciu Revillaxixéu va abrir les sos puertes el sábadu 9 a los once de la mañana y va permanecer abierta fasta les nueve y media, incluyendo una interesante amuesa especialmente diseñada pa persones con discapacidá visual.
La programación pa cinéfilos va entamar con una proyeición dedicada a los más pequeños en La Colexata, dende les 12 hasta la una, mientres nel Palaciu entama’l workshop empobináu por Amalia Pereira, que se va repetir tamién esa tarde y na mañana del domingu. Tamién na Colexata desenvolveráse la conferencia “Onde tou asocedió, Cine, ciencia y revolución”, a cargu de Victor Guillot.
La música entama a sonar ya na sobremesa, con un conciertu de Mow a la una y media. Pela tarde vamos tener a los grupos “ Solu Astra” y “Joe la reina”.
El domingu l’amuesa de cine de La Colexata –de baldre- ta enfocada a los adultos.
Amás de la esposición y el workshop, el domingu vamos poder asistir a una sesión de poesía sonora o a cualesquier de los tres conciertos que van tener llugar, protagonizaos polos grupos “The Neon” “White Bats” y “Malnumy”.
Con esta apretaísima programación Cultur3 Club tien l’envís de ser un eventu al altor de les esixencies d’un públicu cada vez más malo de sosprender y que busca esperiencies nueves “que-y dexen dexar de ser un simple espectaor y convertise en parte del procesu.”
Llucía F. Marqués
This work is licensed under a Creative Commons Attribution 4.0 International License.
