La noticia, recoyida por estremaos medios de comunicación, de que “Un grupu de militantes de la Federación Socialista Asturiana presentará una enmienda pa que’l próximu congresu aprebe puxar pola oficialidá del asturianu” xeneró reaciones alcontraes pente la xente que lleva años lluchando –en bona midía escontra’l PSOE- pola oficialidá

La lluvia de declaraciones y reaciones indignaes nes redes nun se fizo esperar, con comentarios que ponen en dubia tanto la sinceridá d’esta declaración d’intenciones como’l mesmu calter socialista del partíu al que pertenecen.

La primer impresión xeneralizada ye que se trata d’una maniobra política de llaváu de cara, p’algamar votos ya ensin enfotu real, impresión que garra puxu ya si lleemos con calma la propuesta de los militantes de la FSA vemos que tampoco ye un apueste direutu pola oficialidá, sinón que soliciten una mención por alto nuna llei que podría permitir que s’estudiare dalguna triba d’oficialización nel casu de que se diere una hipotética reforma del Estatutu –reforma que nun reclamen-

Dende N’Ast, asociación que lleva décades lluchando polos drechos del asturianu nun pueden esconder la so indignación “Trenta años, trenta, que se diz rápido, tuvieron dende’l PSOE pa sacamos de la llamuerga y llegalizar esta situación catastrófica. Trenta años nos qu’atacaron –y ataquen- la nuesa llingua con toles ferramientes posibles. Non solo la llingua: los gobiernos y ayuntamientos socialistes enfrentáronse a la cultura asturiana en tolos campos, pero eso ya sedría tema mui llargu de falar.”

Aitor García, alcalde del Conceyu Bimenes, conocíu por ser l’únicu en declarar repetidamente y de manera efeutiva la oficialidá del asturianu –daqué que nun ocurre en dalu conceyu gobernáu pol PSOE- y pol so compromisu cola llingua asturiana, nun dubió n’amosar el so escepticismu “Al PSOE lo que menos-y importa ye l’asturianu -nin Asturies- y esto ye pa facese los interesantes y sobre tou que nun seyan oxetu d’ataque por esta cuestión. Esto ye lo mesmo que cuando les mocedaes sociollistes lo teníen nel so ideariu. Cuando lo lleven al congresu va salir que NON y asina llueu puen xustificalo con que”democráticamente” nun foi posible.
Ye como’l restu… tola vida se punxeron pa la semeya pa “por si acasu”….

Pel so llau, n’Andecha Astur, organización política que siempres incluyó la oficialidá pente les sos demandes  irrenunciables y que cuenta con un llargu historial de llucha activa pola mesma, llanzaron un par de cencielles entrugues a los promotores d’esta aniciativa “A esos militantes diríallos que si son socialistes, ¿qué pinten nel PSOE?  Y si tan pol asturiano ¿Qué faen nun partíu que sistemáticamente torgó la oficialidá y machacó al pueblu asturianu”

Fasta agora, el documentu oficial redactáu  pola actual direición socialista pal desendolcu de  la “Ley de Pluralidad Lingüística” plantegada pol P.S.O.E. escluye dafechu la oficialidá, apostando pola “promoción del asturiano”, puntu qu’estos militantes propondrán  que seya camudáu de manera “que l’asturianu seya, xunto col castellán, llingua oficial d’Asturies nel momentu en que se produza una reforma del Estatutu d’Autonomía, tal y como afita la Constitución”. Pa ello buscarán, esclarien, “un modelu d’oficialidá d’aplicación progresiva y d’alcuerdu cola situación sociollingüística d’Asturies”.

This work is licensed under a Creative Commons Attribution 4.0 International License.