Rubén Martínez, el neñu con síndrome de Hurler que llevaba tiempu buscando un donante de célules ma compatibles p’alicar de la so enfermedá, va poder operase gracies a una donación de cordón de naciellu viniente de los Estaos Xuníos
En diez díes, va entamar el procesu pa recibir el tresplante, que-y dexará frenar el procesu dexenerativu producíu por esta enfermedá rara. La so familia quier destacar la importancia de les donaciones de sangre del cordón de naciellu, una práutica non abondo estendía que pue salvar munches vides.
La donación de Sangre de Cordón de Naciellu permite caltener les célules ma que s’atopen na médula y nel sangre del cordón pa que puean ser tresplantaes a pacientes que carecen una enfermedá conxénita o alquirida del migollu óseu (por casu, lleucemies o’l síndrome de Hurler)
N’Asturies esiste dende va años un bancu públicu de sangre de cordón que recueye estes donaciones y permite qu’estes célules seyan usaes por cualesquier persona que les precise, cualesquier embarazada pue donar el cordón del so naciellu cenciellamente roblando un consentimientu, siempres que l’embaranzu y el partu tengan un desendolcu normal. La donación nun afeuta al partu: una vegada nació’l ñácaru, estrayese’l sangre del cordón y guardase nuna bolsa. Sicasí, son munches les muyeres que dieron a lluz n’hospitales asturianos y que nun recibieron esta información, perdiéndose la posibilidá de miles de donaciones. Nel casu de que’l personal sanitariu nun informe, la ma pue solicitar los documentos pa que la donación se lleve a cabu.
Llucía F. Marqués
This work is licensed under a Creative Commons Attribution 4.0 International License.
