Esti cursu  entamen al cole cuasi mil escolinos menos que l’añu pasáu, una amuesa más del despoblamientu y avieyamientu que tamos careciendo nel país

La cifra d’escolinos matriculaos n’educación infantil – ente los tres y los seies años- y primaria – de los seies fasta los dolce- pasó de los 68.473 a los 67.550 rapacinos, correspondiendo’l total del descensu -950- a los más pequeños y sumándose 27 a los que cursen primaria.

Este ye’l primer añu nel que la baxada de la natalidá dexa notar los sos efeutos d’una manera tan bultable, pero probablemente nun va ser el postreru, una y bones la emigración de mocedá mientres décades, xunío a la baxa natalidá resultante de la precariedá llaboral y del difícil acesu a la vivienda, fai prever malos tiempos pa les escueles d’infantil n’Asturies.

Esto podría repercutir nuna mayor calidá educativa, amenorgando la ratio d’escolinos per aula, pero esti “efeutu positivu” malpenes va notase, una y bones la decisión de la Conseyería d’Educación foi la d’amenorgar en catorce les unidaes educatives nesti tramu, unidaes qu’una vegada zarraes resulta bien difícil recuperar, entá nel hipotéticu y poco probable casu d’un repique xeneracional.

This work is licensed under a Creative Commons Attribution 4.0 International License.