Lo que’l señor Conseyeru llama “diferencies de criteriu” ente les necesidaes de profesoráu que piden los centros educativos y lo que los servicios téunicos consideren que tien qu’haber dexa a cientos d’alumnos ensin profesores al entamu de cursu

Mientres la inauguración de les clases d’Infantil y Primaria Genaro Alonso restó importancia a la falta de profesoráu nos centros y resalvó l’incumplimientu de los alcuerdos alcanzaos coles plantiyes, nos que s’establez nidiamente cuál ye’l númberu de profesores que correspuende en función de les aules qu’hai nel centru y defínense les tutoríes de Primaria y los sofitos n’Infantil.

Según el sindicatu d’enseñantes SUATEA “La realidá ye que lo que s’aplica son una riestra de criterios numbéricos nos que cada docente traduzse nun númberu d’hores, ensin atender otres cuestiones que solo carecen los que tán “a pié de l’aula”. Los especialistes son estrumíos al máximu asumiendo tutoríes y xenérense medies xornaes fasta la irracionalidá, de forma que nun queda nin un minutu pa les coordinaciones, pa los sofitos, pa los desdobles… Tou ello ensin dar tregua a les organizaciones sindicales p’ameyorar les condiciones llaborales del profesoráu, que siguen tando igual que nos peores momentos de la crisis.”

Poro, piden responsabilidaes y qu’estes se vean espeyaes na convocatoria de places que s’espera pa fin de mes, na que se cuenta con que seyan cientos los profesores riquíos pa unes places que tendríen de tar cubiertes dende l’un de setiembre.

Redaición InfoAsturies

This work is licensed under a Creative Commons Attribution 4.0 International License.