“Non más de 5€ por ver fúbol asturianu. Precios populares = campos enllenos” ye’l llema d’esta campaña, que defende precios asequibles pa fomentar l’asistencia a los campos de fútbol asturianos

Dende esti equipu asturianu de Primera Autonómica son coscientes de la precariedá de la situación socioeconómica de la población del país y la consecuente perda de capacidá alquisitiva, polo que proponen precios más baxos qu’afalen a la xente a acudir a los partíos “Como xente qu’aprecia’l fútbol nun nos gusta ver los estadios vacíos, lo que ye consecuencia de milenta razones; ente elles, tamién, creemos que nos atopamos col eleváu preciu de les entraes. Nun hai más que mirar pa otros países que, con mayores salarios, tienen precios pa ver competiciones d’altu nivel equivalentes, n’ocasiones, a los de campeonatos non profesionales d’Asturies. Nun ye razonable.”
Anguañu les entraes ronden los 15 € en tercera división y los 8 € n’Autonómica, esceptuando les de los partíos del Rosal, que s’afitó esti añu en 5 €, convidando al restu d’equipos a pautar el mesmu preciu.

Tamién reconocen les  torgues que tienen que soportar los clubs: pagar fiches, árbitros, materiales, balones, equipaciones, entrenadores, desplazamientos, igües nel campu…pero tienen claro que “la política de facer recayer nes aficiones les males xestiones de federaciones o instituciones nun ye más qu’un círculu viciosu nel que les consecuencies son eses: campos vacíos y graes vacíes”.

El Rosal F.C. ye un equipu qu’amosó siempres la so sensibilidá pa cola situación que carez la población asturiana, el so compromisu pa cola clas trabayadora del país y pa coles dificultaes de la mocedá, protagonizando dellos actos de denuncia de la emigración forciada de mozos y moces asturianos.

Nel Dos Santos

This work is licensed under a Creative Commons Attribution 4.0 International License.