El Colectivu Ecoloxista d’Avilés presentó allegamientos énte’l nuevu trámite de la promotora Aldergaten, inmobiliaria que pretende edificar  nes dunes del Espartal

La finca na que quieren construyise viviendes, de casi 45.000 m2, na primer  llínia del complexu dunar d’El Espartal, ye propiedá d’Aldergarten que mercaron la finca en fecha posterior a la publicación de la Direutiva CE 92/43, polo que los valores ambientales de la mesma yá taben protexíos pola llexislación europea y nacional nel momentu de la compra.

La zona onde pretenden construyir ta dientro de la Zona Especial de Caltenimientu (ZEC) Cabu Bustu a Lluanco, tando presentes na mesma hábitats d’interés comuñal, como les dunes embrionaries (dunes móviles primaries) y los gorbizales mediterráneos y oromediterráneos primarios y secundarios con dominiu de xenistees, que les sos condiciones naturales tienen de ser calteníes d’alcuerdu a la so catalogación.

Sicasí, la construcción propuesta afeutaría bultablemente al actual sistema dunar, faltando na solicitú de la empresa los estudios correspondientes al impautu de la continua erosión mariniega que carecería’l frente dunar de la sablera del Espartal, con una perda continua de sable nel frente de duna.

Tampoco presenta la empresa informes de salobridá pa los futuros moraores d’eses viviendes, yá que ye una fastera que destaca pola so ellevaísima contaminación del aire, siendo colindante amás coles balses d’AZSA, con filtraciones que llegaron a la zona, afeutando al suelu. Les persones que viven anguañu nes cercaníes presentaron numberoses quexes pol eleváu nivel acedu, posiblemente por emisiones d’azufre, con un bultable impautu sobro la salú de los vecinos.

Llucía F. Marqués

This work is licensed under a Creative Commons Attribution 4.0 International License.