El prósimu 1 d’ochobre Reciella, l’asociación de families pol asturianu, cellebra nel Muséu del Pueblu d’Asturies, en Xixón, la quinta edición del Díi de la Reciella
Seique entá nun se dio a conocer el 100% de la programación, podemos adelantavos que tornará a xugase’l partíu de fútbol infantil entamáu pol U.C. Ciares y narráu dafechu n’asturianu, al qu’esti añu sumaráse un partíu infantil de Rugbi, colos xugaores del Xixón Rugbi Club, que de magar esti añu entra a formar parte de les entidaes collaboradores col Díi de la Reciella.
Y por supuestu, dientro del ámbitu esportivu nun faltará la II Entaina, la carrera popular de families que percorrerá’l Muséu del Pueblu d’Asturies pente rises y simbolismu, na que tres xeneraciones de la mesma familia dirán pasándose’l testigu de la llingua asturiana, comu seña de la tresmisión interxeneracional. Ye importante facer previamente la inscripción pa la II Entaina, pa facilitar la organización de la mesma, ya que se cuenta que vaiga ser multitudinaria. Como novedá, esti añu estremaránse 4 categoríes pa la reciella ya’l repartu de regalinos pa los neños/es participantes.
Aparte d’ello, nun faltará la música, los talleres, la lliteratura, los xuegos y como non, la comida y bébora, tolo necesario pa que les families esfruten d’una prestosa xornada serondiega en sofitu de la llingua llariega.
Llucía F. Marqués
This work is licensed under a Creative Commons Attribution 4.0 International License.
