Más de 300 fallos nes llistes d’alxudicación de la renta social y un retrasu descomanáu na entrega de les tarxetes xeneren esmolición pente los solicitantes de la mesma

L’iviernu ta en casa y son munches les families que recibieren con allegría la noticia d’esta ayuda del ayuntamientu de Xixón, cola que cuntaben pa enfrentase a les compres inevitables d’estes feches: xandals, playeros, material escolar, xaquetes, ropa d’abrigu, calzao d’iviernu…

Tal como s’especificaba nes bases, les pidiciones tienen que dir recibiendo rempuesta (aprebada o denegada) en rigurosu orde de fecha de solicitú. El 18 d’agostu salía la primer llista de beneficiarios… con cuatro espedientes, les famoses cuatro primeres tarxetes entregaes de les que se fizo ecu la prensa.  A los dos díes, como con cuentagotes, la segunda llista, con 19 aprebaes , 8 denegaes y la primer sospresa: falten númberos.  Cuatro de los solicitantes que deberíen apaecer, acordies l’orde de llista, nun apaecen, nin aprebaos nin denegaos.

Les llistes 3 y 4 esperaron fasta’l caberu díi del mes, ya’l 31 d’agostu y l’un de setiembre salieron  un par de llistes bultablemente más llargues -15 páxines pente aprebaes y denegaes, en total-, pero con cerca de 40 espedientes “perdíos” na primera y 132 na segunda. L’alarma saltó pente los perxudicaos y les llamaes a los centros sociales nun se ficieron esperar, recibiéndose rempuestes contradictories: mentanto a unos se-yos dicía que “los espedientes van a estremáu ritmu dependiendo d’onde se presentaren y por eso saldrán más tarde” otros recibíen la información de la esistencia d’un “fallu informáticu”. La llista númberu 5, na que –acordies informaciones telefóniques-  tendríen d’apaecer tolos “númberos perdíos”  dióse a conocer el díi 4 de setiembre, y nelli non solo nun s’igua’l problema, recuperándose namás dalgunos de los espedientes atrasaos, sinón que s’empeora al apaecer otros cuasi doscientos saltos de númberu, sumando un total que supera los 300 y calteniéndose ensin apaecer inclusu espedientes de la llista del venti  d’agostu.

Los informadores nun se ponen d’alcuerdu sobre si esos espedientes ya tan estudiaos, pero nun salen nes llistes por mentáu fallu informáticu, o si tan estudiándose, o si van estudiase con posterioridá. Entantu, los afeutaos temen perder el so puestu na llista, ya que les concesiones siguen l’orde d’iscripción  fasta fin de presupuestu y temen qu’esti se fine anantia de tener rempuesta a les sos solicitúes.

Per otru llau, les tarxetes ya concedíes, que nun entamu tendríen de recibise nel plazu d’una selmana dende la so aprobación, tan retrasándose. Un beneficiariu cuntaba asina la so esperiencia, tres de cuasi un mes d’espera “Va unos díes llame y qu’una selmana non, qu’entre 15 a 20 díes tardaríen. Llamo otra vez porque se cumplen los 15 díes y dizme que 20. Al informar de que los primeros de la llista ya pasaron los 20 díes y aún na, respuende qu’entre 20 díes a un mes…asina que pregunto ¿ y  depués d’esi mes si nun me llamen ???  y rematando contesta bueno …. a lo meyor retrásense mes y mediu.”

Entantu, pasó l’entamu de cursu, l’iviernu entra con fuercia y les families más probes de Xixón siguen ensin tener un gabitu pa mercar los bienes de primerísima necesidá. “Con un pocu suerte, pa les navidaes tendrémoslo” diz una de les afeutaes polos espedientes saltaos, “pero ente tanto l’Ayuntamientu lleva echándose flores dende mayu”.

Redaición InfoAsturies

This work is licensed under a Creative Commons Attribution 4.0 International License.